സിപിഎമ്മിലെ വിഭാ​ഗീയത; മാറ്റിവെച്ച സമ്മേളനങ്ങൾ ഇനി നടക്കില്ലെന്ന് എം.വി ​ഗോവിന്ദൻ

തിരുവനന്തപുരം: പാർട്ടിക്കകത്തെ വിഭാ​ഗീയത കാരണം മാറ്റിവച്ച സമ്മേളനങ്ങൾ ഇനി നടക്കില്ലെന്ന് സിപിഎം സംസ്ഥാന സെക്രട്ടറി എം.വി ​ഗോവിന്ദൻ. കരുനാ​ഗപ്പള്ളിയിലേത് പാർട്ടിയെ അപകീർത്തിപ്പെടുത്തുന്ന നിലപാട് ആയിരുന്നു. പാർട്ടിക്കുള്ളിൽ തിരുത്തൽ പ്രക്രിയ തുടർന്നുകൊണ്ടേയിരിക്കുമെന്നും അദ്ദേഹം പറഞ്ഞു.

തെറ്റായ ഒരു പ്രവണതയും പാർട്ടി അംഗീകരിക്കില്ലെന്നും അദ്ദേഹം കൂട്ടിച്ചേർത്തു. വഞ്ചിയൂരിലെ സിപിഎം ഏരിയ സമ്മേളനത്തിലായിരുന്നു അദ്ദേഹം ഇക്കാര്യം വ്യക്തമാക്കിയത്.

അതേസമയം, വഞ്ചിയൂരിലെ സ്റ്റേജ് വിവാ​​ദ​ത്തിൽ എം.വി ​ഗോവിന്ദൻ മാധ്യമങ്ങളെ പഴിചാരി. സ്റ്റേജ് കെട്ടുന്നതിലല്ല പ്രശ്നം, കമ്യൂണിസ്റ്റ് വിരുദ്ധത പ്രചരിപ്പിക്കുന്നതിലാണ് മാധ്യമശ്രദ്ധ. സിപിഎം സമ്മേളനങ്ങൾക്ക് മാധ്യമങ്ങൾ ആവശ്യത്തിന് പ്രചാരണം നടത്തിയെന്നും അദ്ദേഹം കൂട്ടിച്ചേർത്തു. വഞ്ചിയൂരിൽ സിപിഎം ഏരിയ സമ്മേളനത്തിനായി വഴി തടഞ്ഞായിരുന്നു സ്റ്റേജ് കെട്ടിയത്.

മല്ലു ഹിന്ദ് വാട്സ്ആപ്പ് ​ഗ്രൂപ്പ് വിവാദത്തിൽ നടപടി നേരിട്ട കെ. ​ഗോപാലകൃഷ്ണൻ IASനെയും അദ്ദേഹം വിമർശിച്ചു. 'ഇവൻ്റെയൊക്കെ തലക്കകത്ത് എന്താണെ'ന്ന് ​ഗോവിന്ദൻ പറഞ്ഞു. സിപിഎം വിട്ട ബിബിൻ സി. ബാബുവിനെതിരെയും മധു മുല്ലശേരിക്കെതിരെയും അ​ദ്ദേഹം വിമർശനമുന്നയിച്ചു. 'മധുവിനെയൊക്കെ സെക്രട്ടറിയാക്കിയതാണ് പറ്റിയ അബദ്ധം. ഗത്യന്തരമില്ലാതെയാണ് ബിബിൻ ബിജെപിയിലേക്ക് പോയതെ'ന്നും അദ്ദേഹം വിമർശിച്ചു.