ഇ-ഗ്രാൻഡ് ലഭിക്കുന്നില്ല: എസ് സി -എസ് ടി വിദ്യാർഥികളുടെ ഉന്നത പഠനം പ്രതിസന്ധിയിൽ

പാലക്കാട്ക്: ഇ-ഗ്രാൻഡ് ലഭിക്കാതെ പ്രതിസന്ധിയിലായി എസ് സി -എസ് ടി വിഭാഗം കുട്ടികളുടെ ഉന്നത പഠനം. കഴിഞ്ഞ രണ്ട് വർഷമായി തുക മുടങ്ങിയത് തങ്ങളുടെ പഠനത്തെ കാര്യമായി ബാധിക്കുന്നുണ്ടെന്ന് കുട്ടികൾ പറയുന്നു.സെം ഫീസ് ഉൾപ്പെടുന്ന ഇ-ഗ്രാൻഡ് വിദ്യാർത്ഥികളുടെ അക്കൗണ്ടുകളിലേക്ക് വരുന്ന രീതിയിലേക്ക് മാറിയതോടെ കോളേജുകളുടെ ഭാഗത്ത് നിന്നുള്ള സമ്മർദ്ദവും വർധിച്ചു.

എസ് സി - എസ് ടി കുട്ടികളുടെ ഉന്നത പഠനത്തിന് വലിയ ആശ്രയമായിരുന്നു സർക്കാർ നൽകുന്ന ഇ ഗ്രാൻഡ്. ഈ സാമ്പത്തിക സഹായം മുടങ്ങിയതോടെ വലിയ സമ്മർദ്ദത്തിലാണ് വിദ്യാർത്ഥികൾ. ഹോസ്റ്റൽ ഫീസ് ,കോളേജിലേക്കുള്ള യാത്ര,പുസ്തകങ്ങൾ എന്നിവയുടെ ചിലവുകൾ ഇ ഗ്രാൻഡിൽ നിന്നായിരുന്നു കുട്ടികൾ കണ്ടെത്തിയത്.

നേരത്തെ സെം ഫീസ് ഉൾപ്പടെ കോളേജുകളുടെ അക്കൗണ്ടുകളിലേക്ക് നേരിട്ട് എത്തിയിരുന്നു.ഈ രീതി പിൻവലിച്ച് തുക വിദ്യാർത്ഥികളുടെ അക്കൗണ്ടുകളിലേക്ക് നൽകാൻ സർക്കാർ തീരുമാനിച്ചു. ഇതോടെ സെം ഫീസ് ലഭിക്കാതാകുമ്പോൾ വിദ്യാർത്ഥികൾക്ക് കോളേജുകളുടെ ഭാഗത്ത് നിന്നും സമ്മർദ്ദം ഉണ്ടാകും. ഈ തുക കണ്ടെത്താൻ ക്ലാസിന് ശേഷം രാത്രിയിൽ മറ്റ് ജോലികൾക്ക് പോകേണ്ട സാഹചര്യമാണ് വിദ്യാർത്ഥികൾക്ക്.

ഇതിനും സാധിക്കാതെ പഠനം പാതി വഴിയിൽ അവസാനിപ്പിച്ചവരുമുണ്ട്. പിന്നോക്ക വിഭാഗങ്ങളിൽ നിന്നുള്ള ഈ വിദ്യാർത്ഥികളുടെ നിസ്സഹായത സർക്കാർ അടിയന്തരമായി പരിഹരിക്കണമെന്നാണ് ആവശ്യം. ഇതിനോടകം വിഷയത്തിൽ വലിയ പ്രതിഷേധമാണ് പല ഭാഗങ്ങളിൽ നിന്നും ഉയരുന്നത്.