പാലക്കാട് നിയമസഭ തെരഞ്ഞടുപ്പ്;​ യുഡിഎഫ് റോഡ്​ ഷോയിൽ പങ്കെടുത്ത് സന്ദീപ്​ വാര്യർ

പാലക്കാട്: പാലക്കാട് നിയമസഭ തെരഞ്ഞടുപ്പ് പ്രചരണവുമായി ബന്ധപ്പെട്ട് യുഡിഎഫ് റോഡ്​ ഷോയിൽ പങ്കെടുത്ത് സന്ദീപ്​ വാര്യർ. ബിജെപിയിൽ നിന്ന് കോൺ​ഗ്രസിലെത്തിയ സന്ദീപ്​ വാര്യരെ കോൺ​ഗ്രസ് പ്രവർത്തകർ എടുത്തുയർത്തി.

യുഡിഎഫ് സ്ഥാനാർഥി രാഹുൽ മാങ്കൂട്ടത്തിലിനെ വിജയിപ്പിക്കാതെ ഇനി വിശ്രമമില്ലെന്ന് സന്ദീപ്​ വാര്യർ പറഞ്ഞു. നാളെ പാണക്കാട്ടെത്തി സാദിഖലി തങ്ങളെയും പി. കെ കുഞ്ഞാലിക്കുട്ടിയെയും സന്ദർശിക്കുമെന്ന് സന്ദീപ്​ വാര്യർ കൂട്ടിച്ചേർത്തു.

ഇന്ന് രാവിലെയായിരുന്നു സന്ദീപ് വാര്യർ കോൺഗ്രസിൽ ചേർന്നത്. ബിജെപി നേതൃത്വവുമായി ഇടഞ്ഞുനിൽക്കുകയായിരുന്ന സന്ദീപിനെ രഹസ്യനീക്കത്തിലൂടെയാണ് കോൺഗ്രസ് സ്വന്തം പാളയത്തിലെത്തിച്ചത്. രാവിലെ പാലക്കാട് നടന്ന വാർത്താസമ്മേളനത്തിൽ കെപിസിസി പ്രസിഡന്റ് കെ. സുധാകരനും പ്രതിപക്ഷനേതാവ് വി. ഡി സതീശനും ചേർന്നാണ് സന്ദീപിനെ പാർട്ടിയിലേക്ക് സ്വാഗതം ചെയ്തത്.

കോൺഗ്രസ് അംഗത്വം സ്വീകരിച്ചതിന് പിന്നാലെ ബിജെപിക്കെതിരെ രൂക്ഷ വിമർശനമാണ് സന്ദീപ് ഉയർത്തിയത്. പാലക്കാട് നിയമസഭ തെരഞ്ഞടുപ്പിൽ ബിജെപി പരാജയപ്പെടുമെന്നും അദ്ദേഹം പറഞ്ഞു.