എം.ഡി.എം.എയുമായി സ്‌കൂൾ പ്രിൻസിപ്പൽ അറസ്റ്റിൽ

മാനന്തവാടി: എം.ഡി.എം.എയുമായി സ്‌കൂൾ പ്രിൻസിപ്പൽ പിടിയിൽ. പുൽപ്പള്ളി ജയശ്രീ ഹയർ സെക്കൻഡറി സ്‌കൂൾ പ്രിൻസിപ്പൽ ജയരാജ് (48) ആണ് അറസ്റ്റിലായത്. വയനാട് ജില്ലയിലെ ആദ്യത്തെ പുകയില വിമുക്ത കാമ്പസായി ആരോഗ്യവകുപ്പ് തിരഞ്ഞെടുത്ത സ്കൂളാണ് പുൽപള്ളി ജയശ്രീ എച്ച്.എസ്.എസ്.

വാഹന പരിശോധനയ്ക്കിടെയാണ് 0.26 ഗ്രാം എം.ഡി.എം.എ പ്രതിയിൽനിന്നു പിടികൂടിയത്. ഇയാൾ സഞ്ചരിച്ച കെ.എൽ ഡി 7878 നമ്പർ വാഹനവും വൈത്തിരി പൊലീസ് കസ്റ്റഡിയിലെടുത്തിട്ടുണ്ട്.

വെള്ളിയാഴ്ച പുലർച്ച മൂന്നു മണിയോടെ കാറിൽ വരികയായിരുന്ന ജയരാജിനെ മുൻകൂട്ടി ലഭിച്ച വിവരത്തിന്റെ അടിസ്ഥാനത്തിൽ, പട്രോളിങ് നടത്തുന്ന പൊലീസ് വൈത്തിരി ആശുപ ത്രി ജങ്ഷനിൽ വെച്ച് പിടികൂടുകയായിരുന്നു. പരിശോധനയിൽ കീശയിൽ മയക്കുമരുന്ന് കണ്ടെത്തി. സുഹൃത്തിനെ താമരശ്ശേരിയിൽ ഇറക്കി തിരിച്ചുവരുമ്പോഴാണ് ഇയാൾ പൊലീസിന്റെ പിടിയിലാകുന്നത്.

സബ് ഇൻസ്പെക്ടർമാരായ പി. വി. പ്രശോഭ്, പി. മുഹമ്മദ്, സീനിയർ സി.പി.ഒ സി.എച്ച്. ഉനൈസ്, സി.പി.ഒ അരുൺ എന്നിവരാണ് സംഘത്തിലുണ്ടായിരുന്നത്. ജയരാജിനെ സ്റ്റേഷൻ ജാമ്യത്തിൽ വിട്ടയച്ചു.

Summary: School principal arrested with MDMA in Wayanad