തെരുവ് നായയെ ബൈക്കിൽ കെട്ടി വലിച്ച സംഭവത്തിൽ പ്രതി അറസ്റ്റിൽ

മലപ്പുറം: ചുങ്കത്തറയിൽ തെരുവ് നായയെ ബൈക്കിൽ കെട്ടി വലിച്ച സംഭവത്തിൽ പ്രതി അറസ്റ്റിൽ. പൂക്കോട്ടുമണ്ണ സ്വദേശി അബ്ദുൽ കരീമിനെ എടക്കര പൊലീസ് ആണ് അറസ്റ്റ് ചെയ്തത് . തിങ്കളാഴ്ച രാത്രിയാണ് ഇയാൾ ബൈക്കിന് പിറകിൽ നായയെ കെട്ടി വലിച്ചു സഞ്ചരിച്ചത്.

പുലിമുണ്ട സ്വദേശി അനൂപാണ് ഈ ദൃശ്യങ്ങൾ പകർത്തിയത്. അദ്ദേഹം ജോലി കഴിഞ്ഞ് വരുന്ന വഴിക്കാണ് ഈ കാഴ്ച കണ്ടത്. തുടർന്ന് നായയെ കെട്ടിവലിച്ചയാളോട് വാഹനം നിർത്താൻ ആവശ്യപ്പെട്ടെങ്കിലും ഇയാൾ വാഹനം വേഗത്തിൽ ഓടിച്ചുപോവുകയായിരുന്നുവെന്നാണ് അനൂപ് പറയുന്നത്.

പിന്നീട് വാഹനത്തെ പിൻതുടർന്ന് ബൈക്ക് നിർത്തിയ ശേഷമാണ് ഈ ദൃശ്യങ്ങൾ പകർത്തിയത്. അതിനുമുമ്പ് വരെ ഈ നായയെ അതിക്രൂരമായാണ് ഇയാൾ നായയെ റോഡിലൂടെ വലിച്ചിഴച്ചത്. ദൃശ്യങ്ങൾ സമൂഹമാധ്യമങ്ങൾ വഴി പ്രചരിച്ചതിന് പിന്നാലെ എടക്കര പൊലീസ് നടപടിയെടുക്കുകയായിരുന്നു