തൃശൂരിൽ ലോറിയിൽനിന്ന് ഇരുമ്പ് ഷീറ്റ് തെറിച്ചുവീണു; രണ്ടുപേര്‍ മരിച്ചു

തൃശൂർ: തൃശൂർ പുന്നയൂർക്കുളത്ത് ട്രെയിലർ ലോറിയിൽ നിന്ന് ഇരുമ്പ് ഷീറ്റ് പുറത്തേക്ക് വീണ് ബൈക്ക് യാത്രക്കാരായ രണ്ട് പേർ മരിച്ചു. അകലാട് സ്വദേശികളായ മുഹമ്മദലി, ഷാജി എന്നിവരാണ് മരിച്ചത്.

അകലാട് സ്കൂളിന് സമീപം ഇന്ന് രാവിലെയായിരുന്നു അപകടം. ബൈക്കില്‍ യാത്ര ചെയ്യുകയായിരുന്നു മുഹമ്മദലിയും ഷാജിയും. ലോറിയിൽ നിന്ന് ഷീറ്റുകൾ മൊത്തമായി ഇരുവരുടെയും ദേഹത്തേക്ക് വീഴുകയായിരുന്നു. അമിതഭാരമുള്ള ഷീറ്റുകളായതിനാൽ രണ്ടുപേരും സംഭവസ്ഥലത്ത് തന്നെ മരിച്ചു.

മലപ്പുറം രജിസ്‌ട്രേഷനിലുള്ള ലോറിയാണ് അപകടമുണ്ടാക്കിയത്. അപകടം നടന്നയുടൻ ഡ്രൈവർ ഓടി രക്ഷപെട്ടു. ഇയാളെ കണ്ടെത്താനുള്ള ശ്രമം പൊലീസ് ഊർജിതമാക്കി.