വർക്കലയിൽ യുവാവിനെ മർദിച്ച കേസ്; അഞ്ചു പ്രതികൾ കീഴടങ്ങി

തിരുവനന്തപുരം: വർക്കലയിൽ യുവാവിനെ തട്ടിക്കൊണ്ടു പോയി വിവസ്ത്രനാക്കി മർദിച്ച കേസിൽ ഒളിവിലായിരുന്ന ഏഴ് പ്രതികളിൽ അഞ്ചുപേർ അയിരൂർ പോലീസിൽ കീഴടങ്ങി. കേസിലെ രണ്ടാം പ്രതി എറണാകുളം മഞ്ഞുമ്മൽ സ്വദേശി അഭിനവ് (18) , മൂന്നാം പ്രതി എറണാകുളം പാലാരിവട്ടം സ്വദേശി ഒബദ് , നാലാം പ്രതി തൃക്കാക്കര സ്വദേശി അതുൽ പ്രശാന്ത് (22), ആറാം പ്രതി കളമശേരി സ്വദേശി അശ്വിൻ രാജ് (21) , എട്ടാം പ്രതി ഇടപ്പള്ളി സ്വദേശി നീരജ് (22) എന്നിവരാണ് കീഴടങ്ങിയത്.

ഇവരെ ഇന്ന് ആറ്റിങ്ങൽ കോടതിയിൽ ഹാജരാക്കും. കേസിലെ ഒന്നാം പ്രതി ലക്ഷ്മി പ്രിയ , ഒൻപതാം പ്രതി അമൽ മോഹൻ എന്നിവർ റിമന്റിലാണ്. ഇവരുടെ കസ്റ്റഡി അപേക്ഷ നൽകിയിട്ടുണ്ട്. അറസ്റ്റ് രേഖപ്പെടുത്തിയ ഏഴ് പേരെയും കസ്റ്റഡിയിൽ വാങ്ങിയ ശേഷം തിങ്കളാഴ്ച തെളിവെടുപ്പ് ഉൾപ്പെടെയുള്ള നടപടിക്രമങ്ങൾ പൂർത്തിയാക്കുമെന്ന് അയിരൂർ സി.ഐ. സുധീർ .സി എൽ അറിയിച്ചു.