കൊല്ലത്ത് കരോളിനിടെ യുവാവിന് ക്രൂരമർദനം; വാഹനമിടിപ്പിച്ച് കൊല്ലാനും ശ്രമം

കൊല്ലം: ആയൂരിൽ കരോളിനിടെ യുവാവിന് ക്രൂരമർദനം. ആൽബിൻ എ ജോയി എന്ന യുവാവിനാണ് മർദനമേറ്റത്. ആയൂർ സ്വദേശി ജിജോ ടി ലാലാണ് യുവാവിനെ മർദിച്ചത്. തുടർന്ന് വാഹനമിടിപ്പിച്ച് കൊലപ്പെടുത്താൻ ശ്രമിച്ചെന്നും പരാതിയിലുണ്ട്.

കരോൾ സംഘം ഗാനമാലപിക്കുന്നതിനിടെ യാതൊരു പ്രകോപനവും ഇല്ലാതെയാണ് ജിജോ മർദിച്ചതെന്ന് ആൽബിൻ പറഞ്ഞു. ആയൂർ സെന്റ് മേരിസ് ഓർത്തഡോക്സ് പള്ളിയുടെ കരോൾ സർവീസ് അകമൺ പ്രദേശത്ത് നടക്കുന്നതിനിടയാണ് ഇയാൾ ആൽബിനെ മർദിച്ചത്.

പള്ളിയിലെ അംഗമായ പ്രവാസിയുടെ പൂട്ടിക്കിടന്ന വീടിനു മുന്നിൽ യുവാക്കൾ പാടി. വീട്ടുടമയുടെ ആവശ്യപ്രകാരമായിരുന്നു കരോൾ സംഘം ഗാനമാലപിച്ചത്. ഇതിനെ എതിർത്ത് ജിജോ വൈദികനായ ഫാദർ മാത്യു തോമസിനെ അസഭ്യം പറഞ്ഞു. തുടർന്ന് യുവാവിനെ മർദിക്കുകയായിരുന്നെന്നാണ് പരാതി.

ആൽബിന്റെ മുഖത്ത് പരിക്കേൽക്കുകയും മൂക്കിൽ നിന്നും ചോര വരികയും ചെയ്തു. തുടർന്ന് പുനലൂർ താലൂക്ക് ആശുപത്രിയിൽ ചികിത്സ തേടി. മുൻപും പള്ളിയിൽ വച്ച് കമ്മറ്റിയംഗത്തെ ഉൾപ്പെടെ മർദിച്ച കേസിൽ പ്രതിയാണ് ജിജോ. സംഭവത്തിൽ ചടയമംഗലം പൊലീസ് അന്വേഷണം തുടങ്ങി.