കോവിഷീൽഡിന്‍റെ രണ്ടാം ഡോസ്​ 16 ആഴ്ചവരെ ദീർഘിപ്പിക്കാം: വിദഗ്ദ സമിതി

കോവിഡ്​ പ്രതിരോധ വാക്​സിനായ കോവിഷീൽഡിന്‍റെ രണ്ടു ഡോസുകളുടെ ഇടവേള ദീർഘിപ്പിക്കണമെന്ന്​ വിദഗ്ദ സമിതി നിർദേശം. 12 മുതൽ 16 ആഴ്​ചകളുടെ ഇടവേളയിൽ രണ്ടാം ഡോസ്​ വാക്​സിൻ നൽകിയാല്‍ മതി. ഇത് ശരീരത്തിലെ പ്രതിരോധ ശേഷി മെച്ചപ്പെടുത്താൻ ഗുണകരമാകുമെന്നാണ്​ വിലയിരുത്തല്‍. കോവിഡ്​ രോഗമുക്തർക്ക്​ ആറുമാസത്തിന്​ ശേഷം വാക്​സിൻ നൽകിയാൽ മതിയെന്നും നിർദേശത്തിൽ പറയുന്നു.

പ്ലാസ്​മ ചികിത്സയ്ക്ക്​ വിധേയരായവർ 12 ആഴ്ചയ്ക്ക്​ ശേഷം വാക്​സിൻ സ്വീകരിച്ചാല്‍ മതിയാകും. ഗുരുതര അസുഖങ്ങളുണ്ടായിരുന്നവർക്ക്​ രോഗമുക്തി നേടി നാലു മുതൽ എട്ട്​ ആഴ്ചയ്ക്കുള്ളിൽ വാക്​സിൻ സ്വീകരിക്കാം. ഗർഭിണികൾക്ക്​ ആവശ്യമെങ്കിൽ വാക്​സിൻ എടുക്കാം. വാക്​സിനെടുക്കുന്ന കാര്യം സ്വയം തീരുമാനിക്കാം. പ്രസവത്തിന്​ ശേഷം മുലയൂട്ടുന്ന അമ്മമാർക്കും വാക്​സിൻ സ്വീകരിക്കാമെന്ന് വിദഗ്ദ സമിതി ശുപാർശ ചെയ്​തു.

മൂന്നുമാസത്തിനിടെ രണ്ടാംതവണയാണ്​ കോവിഷീൽഡ്​ വാക്​സിൻ ​ഡോസുകളുടെ ഇടവേള നീട്ടുന്നത്​. മാർച്ചിൽ ഇടവേള 28 ദിവസം മുതൽ ആറ്​- എട്ട്​ ആഴ്ചയായി ദീർഘിപ്പിച്ചിരുന്നു. അതേസമയം കോവാക്​സിന്‍റെ ഇടവേളകളിൽ മാറ്റം വരുത്തിയിട്ടില്ല. അത്​ നാലു മുതൽ ആറ്​ ആഴ്ച ഇടവേളയായി തുടരും.