ഓഫ് സീസണിൽ പ്രത്യേക നിരക്കിളവുമായി എയർ ഇന്ത്യ

മസ്കത്തിൽ നിന്നും സലാലയിൽ നിന്നും കേരളത്തി​ലെ വിവിധയിടങ്ങളിലേക്കും മംഗലാപുരത്തേക്കുമുള്ള വൺവേ ടിക്കറ്റുകൾക്കാണ്​ പ്രത്യേക നിരക്ക്​ പ്രഖ്യാപിച്ചിട്ടുള്ളത്

ഓഫ് സീസണിൽ യാത്രക്കാരെ ആകർഷിക്കുന്നതിനായി പ്രത്യേക നിരക്കിളവുമായി എയർ ഇന്ത്യ എക്സ്പ്രസ്​. മസ്കത്തിൽ നിന്നും സലാലയിൽ നിന്നും കേരളത്തി​ലെ വിവിധയിടങ്ങളിലേക്കും മംഗലാപുരത്തേക്കുമുള്ള വൺവേ ടിക്കറ്റുകൾക്കാണ്​ പ്രത്യേക നിരക്ക്​ പ്രഖ്യാപിച്ചിട്ടുള്ളത്​.

മസ്കത്തിൽ നിന്ന്​ കോഴിക്കോട്​,കൊച്ചി, തിരുവനന്തപുരം എന്നിവിടങ്ങളിലേക്കുള്ള ടിക്കറ്റുകൾക്ക്​ 30 റിയാലാണ്​ നിരക്ക്​. മസ്കത്തിൽ നിന്ന്​ മംഗലാപുരത്തേക്കും സലാലയിൽ നിന്ന്​ കോഴിക്കോട്​,കൊച്ചി, തിരുവനന്തപുരം എന്നിവിടങ്ങളിലേക്ക്​ 40 റിയാലിനും ടിക്കറ്റുകൾ ലഭ്യമാകും. രണ്ട്​ വിഭാഗത്തിലും മൂന്ന്​ റിയാൽ സർവീസ്​ ചാർജ്​ കൂടി നൽകണമെന്ന്​ എയർഇന്ത്യ എക്സ്പ്രസ്​ പത്രകുറിപ്പിൽ അറിയിച്ചു. മുപ്പത്​ കിലോ ലഗേജിന്​ ഒപ്പം ഏഴ്​ കിലോയുടെ ഹാൻഡ്​ ബാഗേജും കൊണ്ടുപോകാം. ഈ മാസം 31 വരെ എയർ ഇന്ത്യ എക്സ്പ്രസ് വെബ്സൈറ്റിൽ നിന്നോ അംഗീകൃത ട്രാവൽ ഏജന്‍റുമാരിൽ നിന്നോ വാങ്ങുന്ന ടിക്കറ്റുകൾക്കാകും ഈ പ്രത്യേക നിരക്ക്​ ലഭിക്കുക. സെപ്തംബർ നാലു മുതൽ 2018 മാർച്ച് 24 വരെയുള്ള യാത്രകൾക്ക്​ഈ ടിക്കറ്റുകൾ ഉപയോഗിക്കാം. 5.5 റിയാലും 11 റിയാലും മുൻകൂറായി അടച്ചാൽ യഥാക്രമം അഞ്ച്​ കിലോയുടെയും പത്ത്​ കിലോയുടെയും അധിക ലഗേജ്​ ആനുകൂല്ല്യവും ലഭ്യമാകും. നിശ്ചിത ശതമാനം സീറ്റുകൾക്കാണ് പ്രത്യേക നിരക്കുകളുടെ ആനുകൂല്യം ലഭിക്കുക.