ഗുജറാത്തില്‍ നോട്ട കരുത്തറിയിച്ചു; കിട്ടിയത് അഞ്ചര ലക്ഷത്തിലേറെ വോട്ട്

ഗുജറാത്തില്‍ മൂന്നക്കം കടക്കാതെ ബിജെപി ഒരിക്കല്‍ കൂടി അധികാരത്തിലേറുമ്പോള്‍ നിര്‍ണായക ശക്തിയായി നോട്ട.

ഗുജറാത്തില്‍ മൂന്നക്കം കടക്കാതെ ബിജെപി ഒരിക്കല്‍ കൂടി അധികാരത്തിലേറുമ്പോള്‍ നിര്‍ണായക ശക്തിയായി നോട്ട. ഫലം പുറത്തുവന്നപ്പോള്‍ ബിജെപിക്കും കോണ്‍ഗ്രസിനും സ്വതന്ത്രര്‍ക്കും പിന്നിലായി നാലാം സ്ഥാനത്താണ് നോട്ട.

ബിജെപിക്ക് 49.1 ശതമാനം വോട്ട് വിഹിതം ലഭിച്ചപ്പോള്‍ കോണ്‍ഗ്രസിന് 41.4 ശതമാനം വോട്ട് ലഭിച്ചു. സ്വതന്ത്രര്‍ 4.3 ശതമാനം വോട്ടാണ് നേടിയത്. ഇതിന് പിന്നിലായി കുതിച്ച നോട്ട അഞ്ചര ലക്ഷത്തിലേറെ വോട്ടുമായി 1.8 ശതമാനം വോട്ട് വിഹിതം സ്വന്തമാക്കി. സ്ഥാനാര്‍ഥികളില്‍ വിശ്വാസമില്ലാത്ത, പാര്‍ട്ടികളില്‍ വിശ്വാസമില്ലാത്ത അഞ്ചര ലക്ഷത്തിലേറെ പേരാണ് നോട്ടയില്‍ കുത്തിയത്. പോര്‍ബന്തറില്‍ ബിജെപി ജയിച്ചത് 1855 വോട്ടിന്റെ ഭൂരിപക്ഷത്തിലാണ്. ഇവിടെ നോട്ടക്ക് ലഭിച്ചത് 3433 വോട്ടാണ്. ഇതുപോലെ പതിനഞ്ചിലേറെ സീറ്റുകളില്‍ ആയിരം വോട്ടിന്റെ ഭൂരിപക്ഷത്തില്‍ സ്ഥാനാര്‍ഥികള്‍ വിജയിച്ചിട്ടുണ്ട്.