ഭരണകാലത്ത് ബിജെപി ശിവസേനയെ കണ്ടത് അടിമകളെപ്പോലെ: സഞ്ജയ് റാവത്ത്

മഹാരാഷ്ട്രയിലെ കഴിഞ്ഞ ഭരണകാലത്ത് ബിജെപി തങ്ങളെ അടിമകളായാണ് കണ്ടതെന്ന് ശിവസേന നേതാവ് സഞ്ജയ് റാവത്ത് എം.പി. ബിജെപി ശിവസേനയെ ഇല്ലാതാക്കാന്‍ ശ്രമം നടത്തിയെന്നും സഞ്ജയ് റാവത്ത് പറഞ്ഞു. വടക്കൻ മഹാരാഷ്ട്രയിലെ ജൽഗാവിൽ പാർട്ടി പ്രവർത്തകരോട്​ സംസാരിക്കുകയായിരുന്നു അദ്ദേഹം.

'മുൻ സർക്കാറിൽ ശിവസേനക്ക്​ ബി.ജെ.പിക്കൊപ്പം തുല്യ അധികാരമുണ്ടായിരുന്നു. എന്നാൽ, അവർ നമ്മളോട് അടിമകളെപ്പോലെയാണ് പെരുമാറിയത്. നമ്മുടെ പിന്തുണ കാരണം ബി.ജെ.പി അധികാരം കൈയാളിയെങ്കിലും, അത്​ ദുരുപയോഗം ചെയ്​ത്​ പാർട്ടിയെ ഇല്ലാതാക്കാനുള്ള ശ്രമങ്ങൾ അവര്‍ നടത്തി' സഞ്ജയ് റാവത്ത് പറഞ്ഞു.

മഹാരാഷ്ട്ര മുഖ്യമന്ത്രി ഉദ്ദവ് താക്കറെ പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തിയതിന് തൊട്ടുപിന്നാലെയാണ് റാവത്തിന്‍റെ പ്രസ്താവന. താക്കറെ - മോദി കൂടിക്കാഴ്ച മഹാരാഷ്ട്ര രാഷ്ട്രീയത്തില്‍ വലിയ അഭ്യൂഹങ്ങള്‍ക്കാണ് വഴിവെച്ചത്. മറാത്ത സംവരണവുമായി ബന്ധപ്പെട്ട് ഉപമുഖ്യമന്ത്രി അജിത്​ പവാർ, നിയമസഭ സമിതി അധ്യക്ഷന്‍ അശോക്​ ചവാൻ എന്നിവർക്കൊപ്പം ഔദ്യോഗിക ചർച്ചക്ക്​ ഡൽഹിയിൽ ചെന്ന താക്കറെ അരമണിക്കൂറോളം​ പ്രധാനമന്ത്രി നരേന്ദ്ര മോദിയുമായി തനിച്ച്​ കൂടിക്കാഴ്​ച നടത്തിയിരുന്നു​.

2019ൽ മുഖ്യമന്ത്രി സ്​ഥാനവുമായി ബന്ധപ്പെട്ടാണ്​ ശിവസേന - ബി.ജെ.പി സഖ്യം തകരുന്നത്​. ബി.ജെ.പിയുടെ ഏറെ കാല​ത്തെ സഖ്യകക്ഷിയായിരുന്ന സേന പിന്നീട് മഹാ വികാസ് സർക്കാർ രൂപീകരിക്കാൻ എൻ.‌സി.‌പി, കോൺഗ്രസ്​ എന്നിവരുമായി കൈകോർക്കുകയായിരുന്നു.