രക്ഷപ്പെടുന്നതിനിടെ പീഡനക്കേസ് പ്രതി പൊലീസ് വെടിവെപ്പില്‍ കൊല്ലപ്പെട്ടു

ബം​ഗളുരുവിൽ ബം​ഗ്ലാദേശി യുവതിയെ കൂട്ടബലാത്സം​ഗം ചെയ്ത കേസിലെ പ്രതി പൊലീസ് വെടിവെപ്പിൽ കൊല്ലപ്പെട്ടു. പ്രതിയെ പിടികൂടാനുള്ള ശ്രമത്തിനിടെ ആക്രമിക്കാനൊരുങ്ങിയ പ്രതിക്ക് സംഘട്ടനത്തിനിടെ വെടിയേൽക്കുകയായിരുന്നുവെന്ന് പൊലീസ് അറിയിച്ചു. ബംഗളുരു കൂട്ടബലാത്സം​ഗ കേസിൽ പത്ത് പേരെ ഇതുവരെ പൊലീസ് അറസ്റ്റ് ചെയ്തു.

പൊലീസിന് നേരെ കത്തി വീശി രക്ഷപ്പെടാൻ ശ്രമിക്കുന്നതിനിടെ പീഡനക്കേസ് പ്രതി ഷാബാസിനെ പൊലീസ് വെടിവെക്കുകയായിരുന്നു. പ്രതിയുമായുള്ള സംഘട്ടനത്തിൽ ഒരു പൊലീസ് ഉദ്യോ​ഗസ്ഥനും പരിക്കേറ്റു.we

മൂന്ന് വർഷം മുൻപ് മനുഷ്യക്കടത്ത് റാക്കറ്റിന്റെ ചതിയിൽ പെട്ട് ഇന്ത്യയിലെത്തിയ യുവതിയെ ബം​ഗളുരുവിൽ വെച്ച് സംഘം പീഡിപ്പിക്കുകയായിരുന്നുവെന്ന് പൊലീസ് പറഞ്ഞു. പ്രതികളുമായുള്ള സാമ്പത്തിക ഇടപാടിനെ ചൊല്ലി യുവതി നേരത്തെ ശത്രുതയിലായിരുന്നെന്നും, ഇവരുമായുള്ള തർക്കം അക്രമത്തിലേക്കും ക്രൂരമായ പീഡനത്തിലേക്കും വഴിവെക്കുകയുമായിരുന്നെന്നുമാണ് പൊലീസിനെ ഉദ്ധരിച്ച് ദേശീയ മാധ്യമങ്ങൾ റിപ്പോർട്ട് ചെയ്യുന്നത്.