ചൈനയില്‍ വന്‍ഭൂചലനം; 46 മരണം, വ്യാപക നാശനഷ്ടം

ബെയ്‍ജിംഗ്: ചൈനയിലെ സിചുവാൻ പ്രവിശ്യയിലുണ്ടായ വന്‍ ഭൂചലനത്തില്‍ 46 പേര്‍ കൊല്ലപ്പെട്ടു. റിക്ടര്‍ സ്കെയിലില്‍ 6.6 തീവ്രത രേഖപ്പെടുത്തിയ ഭൂചലനത്തില്‍ നിരവധി വീടുകള്‍ തകരുകയും ചെയ്തു. വന്‍നാശനഷ്ടമാണ് ഉണ്ടായത്. തിങ്കളാഴ്ച കാങ്‌ഡിംഗ് നഗരത്തിന് 43 കിലോമീറ്റർ തെക്ക് കിഴക്കായി 10 കിലോമീറ്റർ ആഴത്തിലാണ് ഭൂചലനം അനുഭവപ്പെട്ടതെന്ന് യുഎസ് ജിയോളജിക്കൽ സർവെ അറിയിച്ചു.

പ്രവിശ്യാ തലസ്ഥാനമായ ചെങ്ഡുവിനെ ഭൂചലനം തകര്‍ത്തുകളഞ്ഞു. കോവിഡ് ലോക്ഡൗണ്‍ മൂലം ആളുകളെല്ലാം വീട്ടില്‍ തന്നെ കഴിഞ്ഞിരുന്ന സമയത്താണ് ഭൂചലനമുണ്ടായത്. ഭൂകമ്പത്തെ തുടർന്നുണ്ടായ മണ്ണിടിച്ചിലിൽ ഗുരുതരമായ നാശനഷ്ടങ്ങൾ ഉണ്ടായിട്ടുണ്ടെന്ന് ചൈനീസ് സർക്കാർ ഉടമസ്ഥതയിലുള്ള ബ്രോഡ്കാസ്റ്ററായ സിസിടിവി റിപ്പോർട്ട് ചെയ്തു. 10,000-ത്തിലധികം ആളുകൾ താമസിക്കുന്ന പ്രദേശങ്ങളിലെ ടെലികമ്മ്യൂണിക്കേഷൻ ലൈനുകൾ തകരാറിലായി. കൂടാതെ സമീപ പ്രദേശങ്ങളിലും നിരവധി തുടർചലനങ്ങൾ രേഖപ്പെടുത്തിയതായി സംസ്ഥാന മാധ്യമങ്ങൾ റിപ്പോർട്ട് ചെയ്തു. ആദ്യ ഭൂകമ്പത്തിന് ഒരു മണിക്കൂറിനുള്ളിൽ കിഴക്കൻ ടിബറ്റിൽ 4.6 തീവ്രത രേഖപ്പെടുത്തിയ ഭൂചലനം ഉണ്ടായി.

നൂറുകണക്കിന് രക്ഷാപ്രവർത്തകരെ ഭൂകമ്പം നടന്ന പ്രദേശങ്ങളിലേക്ക് അയച്ചതായി സിസിടിവി റിപ്പോർട്ട് ചെയ്തു. കൂടാതെ രക്ഷാപ്രവർത്തകരെ സഹായിക്കാൻ ആയിരത്തിലധികം സൈനികരെയും വിന്യസിച്ചതായി സിചുവാൻ സീസ്മോളജിക്കൽ അതോറിറ്റി അറിയിച്ചു. "ജീവൻ രക്ഷിക്കുന്നതിന് പ്രഥമ പരിഗണന നൽകാനും ദുരന്തബാധിത പ്രദേശങ്ങളിലെ ആളുകളെ രക്ഷിക്കാനും ജീവഹാനി കുറയ്ക്കാനും" പ്രസിഡന്‍റ് ഷി ജിൻപിംഗ് പ്രാദേശിക അധികാരികളോട് ആവശ്യപ്പെട്ടു.

ചൈനയിൽ ഭൂകമ്പങ്ങൾ വളരെ സാധാരണമാണ്, പ്രത്യേകിച്ച് രാജ്യത്തിന്‍റെ തെക്കുപടിഞ്ഞാറൻ ഭാഗത്ത്. 2008-ൽ സിചുവാൻ വെഞ്ചുവാൻ കൗണ്ടിയിൽ 8.0 തീവ്രത രേഖപ്പെടുത്തിയ ഭൂചലനത്തിൽ പതിനായിരക്കണക്കിന് ആളുകൾ മരിക്കുകയും വൻ നാശനഷ്ടങ്ങൾ ഉണ്ടാക്കുകയും ചെയ്തു. ജൂണിൽ തെക്കുപടിഞ്ഞാറൻ ചൈനയിലുണ്ടായ രണ്ട് ഭൂകമ്പങ്ങളെത്തുടർന്ന് കുറഞ്ഞത് നാല് പേർ കൊല്ലപ്പെടുകയും നിരവധി പേർക്ക് പരിക്കേൽക്കുകയും ചെയ്തു.