ഒരു മാസം, ഗസ്സയിൽ തീതുപ്പി ഇസ്രായേൽ ബോംബർ വിമാനങ്ങൾ; വഴിമുട്ടി മധ്യസ്ഥ ചർച്ചകൾ, ലോകത്തുടനീളം പ്രതിഷേധം

ഗസ്സ സിറ്റി: ഗസ്സയിലെ ഇസ്രായേൽ കൂട്ടക്കുരുതിക്ക് ഒരു മാസം. മുപ്പതാം നാളിലും ഗസ്സയിൽ ഇസ്രായേൽ ആക്രമണം ശക്തമാണ്. 12 മണിക്കൂറിനിടെ ആശുപത്രിയും അഭയാർഥി ക്യാമ്പുകളുമടക്കം 50 കേന്ദ്രങ്ങളിലാണ് ബോംബിട്ടത്. ബന്ദികളെ വിടാതെ വെടിനിർത്തൽ ഇല്ലെന്ന്​ ഇസ്രായേലും അമേരിക്കയും വ്യക്തമാക്കിയതോടെ മധ്യസ്ഥ ചർച്ചകൾ വഴിമുട്ടി. ലോകത്തെ വിവിധ നഗരങ്ങളിൽ ഫലസ്തീൻ അനുകൂല റാലികൾ തുടരുകയാണ്​.

ഏറ്റവും കനത്ത വ്യോമ, നാവിക, കരയാക്രമണങ്ങൾക്കാണ്​ ഇന്നലെ രാത്രിയും ഇന്ന്​ വെളുപ്പിനും ഗസ്സ സാക്ഷിയായത്​. വിവിധ ആശുപത്രികൾക്കും അഭയാർഥി ക്യാമ്പുകൾക്കും ജലസംഭരണ കേന്ദ്രങ്ങൾക്കും മേൽ തുരുതുരെ ബോംബാക്രമണം നടന്നു. ഗസ്സയിലെ എല്ലാ ആശയവിനിമയ സംവിധാനങ്ങളും ഇത്​ മൂന്നാം തവണ വിച്ഛേദിച്ചായിരുന്നു സൈനികാക്രമണം. മരിച്ചവരുടെ എണ്ണം തിട്ടപ്പെടുത്തുക അസാധ്യമാണെന്ന്​ റെഡ്​ക്രോസ്​ കേന്ദ്രങ്ങൾ അറിയിച്ചു.

മരുന്നും വെള്ളവും ഭക്ഷണവും ഇന്ധനവും ഇല്ലാതായ ഗസ്സ കൂട്ടപട്ടിണി മരണത്തിലേക്കാണ്​ നീങ്ങുന്നതെന്ന​ യു.എൻ ഏജൻസികളുടെ മുന്നറിയിപ്പുകൾക്കിടയിലാണ്​ ഇസ്രായേലിന്റെ രൂക്ഷമായ ആക്രമണ പരമ്പരകൾ. ഹമാസിനെ ഏതുവിധേനയും സമ്മർദത്തിലാക്കി ബന്ദികളെ കൈമാറാൻ പ്രേരിപ്പിക്കുകയാണ്​ പുതിയ ആക്രമണങ്ങളുടെ ലക്ഷ്യം. ഗസ്സയിൽ തുടരുന്ന കുരുതി മേഖലയിലെ സ്ഥിതി സങ്കീർണമാക്കുകയും യുദ്ധവ്യാപനത്തിന്​ ആക്കം കൂട്ടുകയും ചെയ്​തതായി ഇറാൻ വിദേശകാര്യമന്ത്രി അറിയിച്ചു. പുതിയ യദ്ധമുഖം തുറക്കാൻ ഇത്​ ചെറുത്തുനിൽപ്പ്​ പോരാളികളെ നിർബന്ധിതമാക്കുമെന്നാണ് ഇറാന്റെ മുന്നറിയിപ്പ്​.

ലബനാൻ അതിർത്തിയിലും ആക്രമണ, പ്രത്യാക്രമണങ്ങൾ രൂക്ഷമായി തുടരുകയാണ്​. കിർയത്​ ഷ്​മോനയി​ലെ കെട്ടിടത്തിൽ റോക്കറ്റ്​ പതിച്ച്​ വലിയ നാശനഷ്​ടം ഉണ്ടായി. ദക്ഷിണ ലബനാനിൽ നാല്​ പേർ ​ഇസ്രായേൽ ആക്രമണത്തിൽ കൊല്ലപ്പെട്ടു. യുദ്ധഗതിയും ഭാവിയും വിലയിരുത്താൻ സി.ഐ.എ ഡയറക്​ടർ അടുത്ത ദിവസം ഇസ്രായേലിലെത്തും. ബന്ദികളെ വിടാൻ താൽക്കാലിക വെടിനിർത്തലിന്​ തങ്ങൾ സന്നദ്ധമായിരുന്നെങ്കിലും ഹമാസ്​ വഴങ്ങിയില്ലെന്ന്​ യു.എന്നി​ലെ ഇസ്രായേൽ പ്രതിനിധി. ഗസ്സയിലെ ആശുപത്രികളും അഭയാർഥി ക്യാമ്പുകളും സൈനിക കേന്ദ്രങ്ങളാണെന്ന ഇസ്രായേൽ പ്രചാരണം ഹമാസ്​ തള്ളി.

വസ്​തുത ഉറപ്പാക്കാൻ യു.എന്നിനു ചുവടെയുള്ള അന്തർദേശീയ സംഘം ഗസ്സ സന്ദർശിക്കണമെന്നും ഹമാസ്​ ആവശ്യപ്പെട്ടു. ഹമാസിനെ തുരത്താനുള്ള നിർണായക ആക്രമണമാണ്​ ഇപ്പോൾ തുടരുന്നതെന്ന്​ ഇസ്രായേൽ സൈന്യം. ഗസ്സക്കു മേൽ ആണവായുധം പ്രയാഗിക്കണമെന്ന വിവാദ പ്രസ്താവന നടത്തിയ ഇസ്രായേൽ പൈതൃക മന്ത്രി അമിയെ ഏലിയാഹുവിനെ പിന്തുണച്ച്​ തീവ്ര വലതുപക്ഷ നേതാക്കൾ രംഗത്തുവന്നു