ഇസ്രായേല്‍ ആക്രമണം; കുടിയിറക്കപ്പെട്ട മുസ്‍ലിംകള്‍ക്ക് അഭയകേന്ദ്രമായി ഗസ്സയിലെ ക്രിസ്ത്യന്‍ ദേവാലയം

തെല്‍ അവിവ്: ഗസ്സയുടെ ജീവനെടുത്തുകൊണ്ട് ഇസ്രായേല്‍ ആക്രമണം തുടര്‍ന്നുകൊണ്ടിരിക്കുകയാണ്. ഇതിനിടയില്‍ ഉറ്റവരെ നഷ്ടപ്പെട്ടവരുണ്ട്...മുറിവേറ്റവരുണ്ട്...വീടും നാടും ഉപേക്ഷിച്ച് പലായനം ചെയ്യേണ്ടി വന്നവരുണ്ട്...ഇസ്രായേല്‍ ഉപരോധം മൂലം ഭക്ഷണവും വെള്ളവും വൈദ്യുതിയുമില്ലാതെ വലയുകയാണ് ഗസ്സ ജനത. കിടപ്പാടം പോലും നഷ്ടപ്പെട്ട് പ്രാണനും കൊണ്ടോടുന്നവര്‍ക്കു മുന്നില്‍ പ്രതീക്ഷയുടെ വാതില്‍ തുറന്നുകൊടുക്കുകയാണ് ഗസ്സയിലെ പുരാതന പള്ളിയായ സെന്‍റ് പോർഫിറിയസ് ചര്‍ച്ച്. യുദ്ധത്തില്‍ മുറിവേറ്റവര്‍ക്ക് അഭയകേന്ദ്രമാവുക മാത്രമല്ല, പൊട്ടിത്തെറിക്കുന്ന ബോംബുകളുടെ ഭീകരതയെ അഭിമുഖീകരിക്കുന്നവർക്കിടയിൽ ഐക്യബോധവും ഇസ്രായേലിന്‍റെ ആക്രമണങ്ങളെ അതിജീവിക്കാനുള്ള പ്രതീക്ഷയും നൽകി.

ഇസ്രായേൽ വ്യോമാക്രമണത്തില്‍ വാലാ സോബെ എന്ന യുവതിയുടെ വീടും സമീപപ്രദേശങ്ങളും തകര്‍ത്തപ്പോള്‍ അഭയമായത് സെന്‍റ് പോർഫിറിയസ് ചര്‍ച്ചായിരുന്നു. വടക്കന്‍ ഗസ്സയിലുള്ള ബന്ധുക്കളെ കണ്ട് അവരെയും പള്ളിയില്‍ അഭയം തേടാന്‍ പ്രേരിപ്പിച്ചു. ഈ പുരാതന ദേവാലയത്തിൽ തൽക്കാലത്തേക്കെങ്കിലും സുരക്ഷിതത്വം തേടിയ വ്യത്യസ്ത വിശ്വാസങ്ങളുള്ള ഫലസ്തീനിയൻ കുടുംബങ്ങളിൽ ഒന്ന് മാത്രമാണ് സോബെയുടെ കുടുംബം. ''ഓരോ പകലും ഞങ്ങളിങ്ങനെ കഴിച്ചുകൂട്ടുന്നു. രാത്രി കടന്നുപോകുമോ എന്ന് ഉറപ്പില്ല. ഇവിടെയുള്ള എല്ലാവരുടെയും അനുകമ്പയും ഊഷ്മളതയും ഞങ്ങളുടെ വേദനയെ ലഘൂകരിക്കുന്നു, ”സോബെ വിശദീകരിച്ചു. കുടിയൊഴിപ്പിക്കപ്പെട്ട കുടുംബങ്ങളെ സഹായിക്കുന്ന വൈദികരുടെയും മറ്റ് സഭാ സന്നദ്ധപ്രവർത്തകരുടെയും പിന്തുണയെ അവർ പ്രശംസിച്ചു.

ഇസ്രായേല്‍ വ്യോമാക്രമണത്തില്‍ നിന്നും പള്ളി തല്‍ക്കാലത്തേക്ക് രക്ഷപ്പെട്ടെങ്കിലും പുരോഹിതനായ ഫാദർ ഏലിയാസ് നിതാന്ത ജാഗ്രതയിലാണ്. വീടുകൾ തകർന്നവർക്ക് അഭയം നൽകിയ പള്ളികളും സ്‌കൂളുകളും ഉൾപ്പെടെയുള്ള മറ്റ് സങ്കേതങ്ങളെ ഇസ്രായേൽ സൈന്യം ലക്ഷ്യമിടുന്നതായി അദ്ദേഹം ചൂണ്ടിക്കാട്ടി. പള്ളിക്ക് നേരെയുള്ള ഏതൊരു ആക്രമണവും മതത്തിനെതിരായ ആക്രമണം മാത്രമല്ല, അത് അപലപനീയമാണ്, മറിച്ച് മാനവികതയ്‌ക്കെതിരായ ആക്രമണം കൂടിയായിരിക്കുമെന്ന് ഫാദർ ഏലിയാസ് ഊന്നിപ്പറഞ്ഞു. തന്‍റെ കുടുംബത്തോടൊപ്പം പള്ളിയിൽ അഭയം പ്രാപിച്ച ഫലസ്തീൻ ക്രിസ്ത്യൻ ജോർജ്ജ് ഷബീൻ, തങ്ങളുടെ തെരുവുകൾ മൂന്ന് ഇസ്രായേലി വ്യോമാക്രമണങ്ങളാൽ ലക്ഷ്യം വച്ചതിനാൽ അവർക്ക് മറ്റൊരു സുരക്ഷിത താവളമില്ലെന്ന് വിവരിച്ചു.''ഇവിടെ വന്നതുകൊണ്ട് ഞങ്ങളുടെ ജീവന്‍ രക്ഷിച്ചു. രാത്രിയിൽ, ഞങ്ങൾ ഒരുമിച്ച് - മുസ്‍ലിംകളും ക്രിസ്ത്യാനികളും പ്രായമായവരും ചെറുപ്പക്കാരും - സുരക്ഷിതത്വത്തിനും സമാധാനത്തിനും വേണ്ടി പ്രാർത്ഥിക്കുന്നു." അദ്ദേഹം വിശദീകരിച്ചു.

1150-നും 1160-നും ഇടയിൽ നിർമിച്ചതും അഞ്ചാം നൂറ്റാണ്ടിലെ ഗസ്സ ബിഷപ്പിന്‍റെ പേരിലുള്ളതുമായ സെന്‍റ് പോർഫിറിയസ് ചർച്ച്, ചരിത്രപരമായി ഗസ്സയിലെ ഫലസ്തീനികളുടെ തലമുറകൾക്ക് ഭീതിയുടെ കാലത്ത് ആശ്വാസം നൽകിയിട്ടുണ്ട്.