ഹമാസിന്‍റെ വെടിനിർത്തൽ കരാർ സ്വീകാര്യമല്ലെന്ന് ഇസ്രായേൽ; കര,വ്യോമ,നാവികാക്രമണം കൂടുതൽ ശക്​തമാക്കി

തെല്‍ അവിവ്: ഹമാസുമായി വെടിനിർത്തൽ കരാർ സ്വീകാര്യമല്ലെന്ന്​ വ്യക്​തമാക്കിയ ഇസ്രായേൽ കര,വ്യോമ, നാവികാക്രമണം കൂടുതൽ ശക്​തമാക്കി. എത്ര സമയമെടുത്താലും ഹമാസിനെ അമർച്ച ചെയ്യാതെ യുദ്ധത്തിൽ പിറകോട്ടില്ലെന്ന്​ പ്രധാനമന്ത്രി നെതന്യാഹു. ശക്​തമായ ചെറുത്തുനിൽപ്പിലൂടെ ഇസ്രായേൽ കരസേനക്ക്​ കനത്ത ആഘാതം വരുത്തിയതായി ഹമാസ്​. ബന്ദികളിൽ നിന്ന്​ ഒരു വനിതാ സൈനികയെ മോചിപ്പിക്കാനായത്​ വലിയ നേട്ടമാണെന്ന്​ ഇസ്രായേല്‍.

വെടിനിർത്തൽ നിർദേശം ഇസ്രായേൽ തള്ളിയതോടെ ഗസ്സയിൽ ആക്രമണം കൂടുതൽ രൂക്ഷമായി. നൂറിലേറെ കേന്ദ്രങ്ങളിൽ പിന്നിട്ട 24 മണിക്കൂറുകൾക്കിടയിൽ ബോംബ്​ വർഷിച്ചതായി ഇസ്രായേൽ സൈന്യം. ഗസ്സയിൽ മരണ സംഖ്യ 8500 കടന്നതായാണ്​ റിപ്പോർട്ട്​. ഈ ഘട്ടത്തിൽ വെടിനിർത്തിയാൽ ഹമാസിനാകും അത്​ പ്രയോജനപ്പെടുകയെന്ന്​ ​ വൈറ്റ്​ ഹൗസും പ്രതികരിച്ചു. ഗസ്സയിൽ ആശുപത്രികൾ ഉൾപ്പെടെയുള്ള കേന്ദ്രങ്ങൾക്കു നേരെയും ആക്രമണം തുടർന്നു.

തകർന്ന കെട്ടിടങ്ങൾക്കടിയിൽ കുടുങ്ങിയ നൂറുകണക്കിനാളുകളെ രക്ഷിക്കാൻ വയ്യാത്ത സാഹചര്യമാണുള്ളതെന്ന്​ ഫലസ്​തീൻ ആരോഗ്യ മന്ത്രാലയം. വെള്ളം, മരുന്ന്​, ഭക്ഷണം, ഇന്​ധനം എന്നിവ എത്തിക്കാനുള്ള അന്താരാഷ്​ട്ര ഏജൻസികളുടെ മുറവിളികൾക്കും പ്രതികരണമില്ല. ഘട്ടം ഘട്ടമായി സഹായം വർധിപ്പിക്കാൻ ഇസ്രായേലിനോട്​ ആവശ്യ​പ്പെട്ടതായി അമേരിക്ക പ്രതികരിച്ചു. ഗസ്സയിൽ കടന്നുകയറിയ ഇസ്രായേൽ ടാങ്കുകൾക്കു നേരെ കടുത്ത പ്രതിരോധം തുടരുകയാണെന്ന്​ ഹമാസ്​. കരയുദ്ധം കൂടുതൽ വിപുലപ്പെടുത്താനുള്ള നീക്കത്തിലാണ്​ തങ്ങളെന്ന്​ ഇസ്രായേൽ സൈന്യം. ഹമാസ്​ പിടിയിലുള്ള വനിതാ സൈനികയെ മോചിപ്പിച്ചത്​ എങ്ങനെയെന്ന്​ ഇപ്പോൾ വെളിപ്പെടുത്തില്ലെന്നും സൈനിക നേതൃത്വം.

ബന്ദികളെ വെച്ചുമാറാമെന്ന ഹമാസ്​ നിർദേശവും ഇസ്രായേൽ തള്ളി. നെതന്യാഹുവിനെ അഭിസംബോധന ചെയ്​തു ​കൊണ്ടുള്ള മൂന്ന്​ ഇസ്രായേൽ വനിതാ ബന്ദികളുടെ വീഡിയോ ഹമാസ്​ ഇന്ന​ലെ പുറത്തുവിട്ടിരുന്നു. ക്രൂര മാനസിക പ്രോപഗാണ്ടയാണിതെന്ന്​ ഇസ്രായേൽ പ്രതികരിച്ചു. ലബനാനിൽ നിന്നുള്ള ഹിസ്​ബുല്ല ആ​ക്രമണം രാത്രിയിലും തുടർന്നു. ഇസ്രായേൽ സൈന്യം തിരിച്ചടിച്ചു. യുദ്ധവ്യാപ്​തി ഉണ്ടായാൽ ഇറാനും ഇറാൻ അനുകൂല മിലീഷ്യകൾക്കുമെതിരെ അമേരിക്ക ഇടപെടുമെന്ന സൂചനയാണ്​ ഇസ്രായേലും പെൻറഗണും നൽകുന്നത്​.