ബെയ്റൂത്തിൽ ഇസ്രായേലിന്‍റെ വ്യാപക വ്യോമാക്രമണം; നിരവധി പേർ കൊല്ലപ്പെട്ടു

തെൽ അവീവ്: തെൽ അവീവിനെയും ഹൈഫയെയും വിറപ്പിച്ച ഹിസ്ബുല്ലയുടെ മിസൈൽ ആക്രമണ പരമ്പരക്ക്​ തിരിച്ചടിയായി ബെയ്റൂത്തിൽ ഇസ്രായേലിന്‍റെ വ്യാപക വ്യോമാക്രമണം. തുടർച്ചയായി ഏഴ് തവണ നടന്ന ആക്രമണത്തിൽ നിരവധി പേർ കൊല്ലപ്പെട്ടു. ഇരുപക്ഷവും ആക്രമണം അവസാനിപ്പിക്കണമെന്ന്​ യൂറോപ്യൻ യൂനിയനും അമേരിക്കയും ആവശ്യപ്പെട്ടു.

ഇസ്രായേലിനു നേർക്ക്​ 340 മിസൈലുകളും റോക്കറ്റുകളും അയച്ചായിരുന്നു​ ഹിസ്​ബുല്ലയുടെ തിരിച്ചടി. തലസ്ഥാന നഗരിയായ തെൽ അവീവ്​ ഉൾപ്പെടെ ഇസ്രായേൽ പ്രദേശങ്ങളിൽ ആക്രമണത്തിൽ വൻ നാശനഷ്ടം ഉണ്ടായെന്നാണ്​ റിപ്പോർട്ട്​. ഇന്നലെ പകൽ 40​ ലക്ഷത്തോളം ഇസ്രായേലികൾ പൂർണമായും ബങ്കറുകളിൽ കഴിച്ചുകൂട്ടേണ്ടി വന്നതായി ആർമി റേഡിയോ റിപ്പോർട്ട്​ ചെയ്തു. ഒരുഡസനിലേറെ പേർക്ക്​ പരിക്കുണ്ട്​. ഹൈഫയിലെ നാവിക ആസ്ഥാനത്തിനു നേരെയും വിജയകരമായ മിസൈൽ ആക്രമണം നടന്നതായി ഹിസ്​ബുല്ല അറിയിച്ചു. ഹിസ്​ബുല്ലയുടെ 80 ശതമാനം മിസൈൽ ശേഷിയും തകർത്തുവെന്ന ഇസ്രായേൽ വാദം ഇതോടെ ദുർബലമായി. ഹിസ്​ബുല്ലയുടെ കനത്ത പ്രതിരോധത്തെ തുടർന്ന്​ ദക്ഷിണ ലബനാനില തന്ത്രപ്രധാന കേന്ദ്രത്തിൽ നിന്ന്​ ഇസ്രായേൽ സൈന്യം പിൻവാങ്ങിയതായും റിപ്പോർട്ടുണ്ട്.

ഇതിനു പിന്നാലെയാണ് രാത്രിയിൽ ലബനാൻ തലസ്ഥാനമായ ബെയ്​റൂത്തിനു നേർക്ക്​ ഇസ്രായേൽ വ്യാപക വ്യോമാക്രമണം നടത്തിയത്. ബെയ്​റൂത്തിലെ കൂടുതൽ കെട്ടിടങ്ങളിൽ നിന്ന്​ ആളുകളോട്​ ഒഴിഞ്ഞു പോകാനും ഇസ്രായേൽ ആവശ്യപ്പെട്ടു. ആക്രമണം രൂക്ഷമായതോടെ അമേരിക്കൻ പ്രതിനിധി ഹമോസ്​ ഹോച്​സ്റ്റിന്‍റെ നേതൃത്വത്തിൽ നടന്ന വെടിനിർത്തൽ നീക്കവും വഴിമുട്ടി. നിശ്​ചിത സമയത്തിനുള്ളിൽ ആ​ക്രമണം അവസാനിപ്പിച്ചില്ലെങ്കിൽ മധ്യസ്ഥനീക്കം ഉപേക്ഷിക്കുമെന്ന്​ അമേരിക്കൻ പ്രതിനിധി മുന്നറിയിപ്പ്​ നൽകിയതായി ഇസ്രായേൽ മാധ്യമങ്ങൾ റിപ്പോർട്ട്​ ചെയ്തു. വെടിനിർത്തലിന്​ ഉടൻ തയാറാകണമെന്ന്​ ഹിസ്​ബുല്ലയോടും ഇസ്രായേലിനോടും യൂറോപ്യൻ യൂനിയൻ ആവശ്യപ്പെട്ടു.

അതിനിടെ ഗസ്സയിലും ഇസ്രായേൽ കൂട്ടക്കുരുതി തുടരുകയാണ്. വടക്കൻ ഗസ്സയിലും മറ്റുമായി 46പേർ കൂടി കൊല്ലപ്പെട്ടു. ഗ​സ്സ​യി​ൽ ഒ​രു വ​ർ​ഷ​ത്തി​ലേ​റെ​യാ​യി തു​ട​രു​ന്ന വം​ശ​ഹ​ത്യ​യെ വി​മ​ർ​ശി​ക്കു​ന്ന ഫ​ല​സ്തീ​ൻ പൗ​ര​ന്മാ​രെ ഇ​സ്രാ​യേ​ൽ ത​ട​വി​ലി​ട്ട് പീ​ഡി​പ്പി​ക്കു​ന്ന​താ​യി അ​സോ​സി​യേ​റ്റ​ഡ് പ്ര​സ് ത​യാ​റാ​ക്കി​യ റി​പ്പോ​ർ​ട്ട് പ​റ​യു​ന്നു.