ബൈഡന്റെ വെടിനിർത്തൽ നിർദേശം: ഇസ്രായേൽ തീരുമാനം നീളുന്നു

ദുബൈ: അമേരിക്കൻ പ്രസിഡൻറ്​ ജോ ബൈഡൻ മുന്നോട്ടുവെച്ച വെടിനിർത്തൽ നിർദേശത്തിൽ ഇസ്രായേൽ തീരുമാനം നീളുന്നു. യുദ്ധം അവസാനിപ്പിച്ചാൽ പിന്തുണ പിൻവലിക്കുമെന്ന തീവ്രവലതുപക്ഷത്തി​ന്റെ മുന്നറിയിപ്പാണ്​ തുടർ നീക്കങ്ങൾ കൈ​ക്കൊള്ളുന്നതിൽ നിന്ന് പ്രധാനമന്ത്രി ബെഞ്ചമിൻ​ നെതന്യാഹുവിനെ തടയുന്നത്​.

ജീവനോടെയോ അല്ലാതെയോ ബന്ദികളെ തിരിച്ചെത്തിക്കുമെന്ന്​ നെതന്യാഹു പറഞ്ഞു. ഹമാസിനെ അമർച്ച ചെയ്യുന്നതുൾപ്പെടെ യുദ്ധലക്ഷ്യങ്ങളിൽ നിന്ന്​ പിറകോട്ടില്ലെന്നും അദ്ദേഹം വ്യക്തമാക്കി.

ഇരുവിഭാഗത്തെയും എത്രയും പെ​ട്ടെന്ന്​ ചർച്ചയിലേക്ക്​ കൊണ്ടുവരാൻ ഖത്തറിൽ ചേർന്ന മധ്യസ്​ഥ രാജ്യങ്ങളുടെയും അമേരിക്കയുടെയും യോഗത്തിൽ തീരുമാനിച്ചതായാണ്​ റി​പ്പോർട്ട്​. സി.ഐ.എ മേധാവി വില്യം ബേൺസ്​ ഖത്തർ, ഈജിപ്​ത്​ നേതാക്കളുമായി ചർച്ച നടത്തിയെന്ന്​ ഉദ്യോഗസ്​ഥരെ ഉദ്ധരിച്ച്​ 'ന്യൂയോർക്ക്​ ടൈംസ്​' റിപ്പോർട്ട്​ ചെയ്​തു. ആക്രമണം നിർത്തി സൈന്യത്തെ പിൻവലിക്കുന്ന ഏതൊരു വെടിനിർത്തൽ നിർദേശത്തോടും അനുകൂല സമീപനം സ്വീകരിക്കുമെന്ന്​ ഹമാസ്​ രാഷ്​ട്രീയകാര്യ മേധാവി ഇസ്​മാഈൽ ഹനിയ്യ പറഞ്ഞു.

ദക്ഷിണ ലബനാനിൽ നിന്ന്​ വടക്കൻ ഇസ്രായേലിനു നേർക്കുള്ള ഹിസ്​ബുല്ല ആക്രമണം തടയാൻ വ്യാപക തിരിച്ചടിക്ക്​ സൈന്യം ഒരുങ്ങുന്നതായി റിപ്പോർട്ടുണ്ട്​. എന്നാൽ, ഗസ്സയിൽ വെടിനിർത്തൽ വന്നാൽ ഹിസ്​ബുല്ല ആക്രമണം അവസാനിക്കുമെന്നും വ്യാപക യുദ്ധത്തിലേക്ക്​ നീങ്ങരുതെന്നും അമേരിക്ക ഇസ്രായേലിനെ അറിയിച്ചു.

ഇസ്രായേലി​െൻറ ജറൂസലം ദിനാചരണം വെസ്​റ്റ്​ ബാങ്കിൽ സംഘർഷം വർധിപ്പിച്ചു. കിഴക്കൻ ജറൂസലം ഉൾപ്പെടെ എല്ലാം ഇ​സ്രായേലിനു മാത്രം അവകാശപ്പെട്ടതാ​ണെന്ന്​ മന്ത്രി ബെൻ ഗവിറി​െൻറ പ്രസ്​താവനക്കെതിരെ ഫലസ്​തീൻ പ്രസിഡൻറും ഹമാസും രംഗത്തുവന്നു. പ്രകോപന നീക്കങ്ങൾക്കെതിരെ അറബ്​ ലോകം പ്രതികരിക്കണമെന്ന്​ ഹമാസ്​ ആവശ്യപ്പെട്ടു.

റഫ ഉൾപ്പെടെ ഗസ്സയിൽ ഇസ്രായേൽ ആക്രമണം ശക്​തമായി തുടരുകയാണ്​. ഗസ്സയിൽ പരിക്കേറ്റവർക്ക്​ ചികിത്സ നൽകാൻ ആശുപത്രികൾ ഇല്ലാത്ത സാഹചര്യം മരണസംഖ്യ ഉയർത്തുന്നതായി ഗസ്സ ആരോഗ്യ മന്ത്രാലയം മുന്നറിയിപ്പ്​ നൽകി. പുതുതായി 25 എഫ്-35 യുദ്ധവിമാനങ്ങൾ കൂടി ഇസ്രായേലിന്​ കൈമാറാനുള്ള അമേരിക്കൻ കമ്പനിയുടെ കരാറിനെതിരെ പ്രതിഷേധം ശക്​തമായിട്ടുണ്ട്. ലോക്ഹീഡ് മാർട്ടിനുമായാണ് ഇസ്രായേൽ ചൊവ്വാഴ്ച കരാറിൽ ഒപ്പുവെച്ചത്.