ആണവ കരാർ തീരുമാനം ഉടൻ; ഇറാൻ രേഖാമൂലം പ്രതികരണം കൈമാറി

ടെഹ്റാൻ: ആണവ കരാർ പുനരുജ്ജീവിപ്പിക്കുന്നതുമായി ബന്ധപ്പെട്ട്​ യൂറോപ്യൻ യൂണിയൻ സമർപ്പിച്ച പുതിയ നിർദേശത്തിൽ ഇറാൻ രേഖാമൂലം പ്രതികരണം കൈമാറി. ഉപരോധം പൂർണമായും നീക്കം ചെയ്യുക, ഏതെങ്കിലും രാജ്യം കരാർ ലംഘിച്ചാൽ വൻതുക നഷ്​ട പരിഹാരം നൽകുക എന്നീ നിർദ്ദേശങ്ങൾ ഇറാൻ മുന്നോട്ടു വെച്ചതായാണ്​ വിവരം. അമേരിക്കയും യൂറോപ്യൻ യൂണിയനും ഇറാ​ന്റെ പ്രതികരണം വിലയിരുത്തി വരികയാണ്​.

2015ലെ ആണവ കരാർ പുനരുജ്ജീവിപ്പിക്കാനുതകുന്ന ഏറ്റവും പുതിയ നിർദേശത്തോട്​ യാഥാർഥ്യബോധം കലർന്ന പ്രതികരണമാണ്​ തങ്ങൾ കൈമാറിയ രേഖയിലുള്ളതെന്ന്​ ഇറാൻ അറിയിച്ചു. അമേരിക്കയാണ്​ ഇനി തീരുമാനം കൈക്കൊള്ളേണ്ടതെന്നും ഇറാൻ വ്യക്​തമാക്കി. ഇറാന്റെ പ്രതികരണം വിശദമായി പരിശോധിച്ചു വരികയാണെന്ന്​ യുഎസ്​ സ്​റ്റേറ്റ്​ വകുപ്പ് അറിയിച്ചു. കരാർ പുന:സ്​ഥാപിക്കാനുള്ള ഏറ്റവും മികച്ച അവസരമാണ്​ കൈവന്നിരിക്കുന്നതെന്ന്​ യൂറോപ്യൻ യൂണിയനും പ്രതികരിച്ചു.

പ്രധാനമായും മൂന്ന്​ കാര്യങ്ങളിലാണ്​ അഭിപ്രായ ഭിന്നത രൂപപ്പെട്ടിരുന്നത്​. അവയിൽ കാര്യമായ ചില വിട്ടുവീഴ്​ചകൾക്ക്​ ഇറാൻ സന്നദ്ധമായെന്നാണ്​ റിപ്പോർട്ട്​. അതേസമയം, ഒപ്പുവെച്ച രാജ്യം പിൻവാങ്ങിയാൽ നഷ്​ടപരിഹാര പാക്കേജ്​ വേണമെന്ന ഇറാന്റെ നിർദേശത്തോട്​ അമേരിക്ക എന്തു നിലപാട്​ സ്വീകരിക്കും എന്നത് നിർണായകമാണ്. ഇത് സംബന്ധിച്ച തീരുമാനം അടുത്ത ആഴ്​ച വിയന്നയിൽ ചേരുന്ന മന്ത്രിതല സമിതി യോഗത്തിലുണ്ടായേക്കും. ആണവ കരാർ പുനരുജ്ജീവിപ്പിക്കാനുള്ള തീരുമാനം എണ്ണവിപണി ഉൾപ്പെടെ പല മേഖലകളിലും നിർണായകമായിരിക്കും.