കാനഡയിലെ കത്തോലിക്കാ സ്​കൂൾ പരിസരത്ത്​ കണ്ടെത്തിയത്​ അറുനൂറിലധികം ശവക്കുഴികൾ

പടിഞ്ഞാറൻ കാനഡയിൽ തദ്ദേശീയരായ കുട്ടികൾ പഠിച്ചിരുന്ന മുൻ കത്തോലിക്ക റെസിഡൻഷ്യൽ സ്കൂളിന് സമീപം അജ്ഞാതമായ 600ൽ അധികം ശവക്കുഴികൾ കണ്ടെത്തി. സസ്​കെച്ച്​വാനിൽ 1899-1997 കാഘട്ടത്തിൽ കത്തോലിക്ക​ സഭ നടത്തിയ മാരീവൽ ഇന്ത്യൻ റസിഡൻഷ്യൽ സ്​കൂളിനോടു ചേർന്നാണ്​ കൂട്ടക്കുഴിമാടം കണ്ടെത്തിയത്​. മേയ് അവസാനത്തോടെ ആരംഭിച്ച ഖനനത്തിലാണ് ഞെട്ടിക്കുന്ന കണ്ടെത്തൽ. കഴിഞ്ഞ മാസം മറ്റൊരു സ്കൂളിൽ നിന്ന് 215 മൃതദേഹങ്ങൾ കണ്ടെത്തിയിരുന്നു.

'റഡാറുകൾ ഉപയോ​ഗിച്ചുള്ള പരിശോധനയിൽ സസ്​കെച്ച്​വാൻ പ്രവിശ്യയിലെ മുൻ മാരിവൽ ബോർഡിംഗ് സ്‌കൂളിന്റെ പരിസരത്ത് 751 ശവക്കുഴികളുണ്ടെന്നാണ് സൂചന നൽകുന്നത്, എന്നാൽ റഡാറുകളുടെ കണ്ടെത്തലുകളിൽ പിഴവുകൾ വന്നേക്കാം. എങ്കിലും 600ൽ കൂടുതൽ ശവക്കുഴികൾ പ്രദേശത്തുണ്ടെന്ന് ഉറപ്പുപറയാൻ സാധിക്കും'- കോവെസെസ് ഫസ്റ്റ് നാഷണൽ ചീഫ് കാഡ്മസ് ഡെലോം പറഞ്ഞു.

19ാം നൂറ്റാണ്ടുമുതൽ കാനഡയിൽ ഒന്നര ലക്ഷം കുട്ടികളെയാണ്​ സർക്കാർ സഹായത്തോടെ സഭ നടത്തിയ സ്​കൂളുകളിൽ നിർബന്ധിതമായി ചേർത്തിരുന്നത്​. മതം മാറ്റിയും ഗോത്രവർഗ ഭാഷ സംസാരിക്കാൻ അനുവദിക്കാതെയും കടുത്ത ശിക്ഷണത്തിൽ കഴിഞ്ഞ കുട്ടികളിൽ ആയിരങ്ങൾ രോഗബാധയും മറ്റുമായി മരണത്തിന്​ കീഴടങ്ങി.

അടുത്തിടെ കാനഡയിൽ കണ്ടെത്തിയ ഏറ്റവും വലിയ കുഴിമാടമാണിത്​. സമാന കണ്ടെത്തലുകൾ വ്യാപകമായതോടെ രാജ്യത്തെ ഗോത്ര വർഗ സംഘടനകളും മനുഷ്യാവകാശ പ്രവർത്തകരും രംഗത്തെത്തിയിട്ടുണ്ട്​. റസിഡൻഷ്യൽ സ്​കൂളുകളിൽ വിദ്യാർഥികൾ കടുത്ത ശാരീരിക പീഡനവും പോഷണമില്ലായ്​മയും അനുഭവിച്ചതായി അടുത്തിടെ അന്വേഷണങ്ങളിൽ കണ്ടെത്തിയിരുന്നു. പഠനത്തിനായി കൊണ്ടുവന്ന 6,000 ഓളം വിദ്യാർഥികൾ വിവിധ സ്​കൂളുകളിൽ മരിച്ചതായാണ്​ കണക്ക്​.

ഇത്തരം റസിഡൻഷ്യൽ സ്​കൂളുകൾ നടത്തിയതിന്​ 2008ൽ കാനഡ സർക്കാർ രാജ്യത്തോട്​ മാപ്പുചോദിച്ചിരുന്നു. സർക്കാറും ക്രിസ്​ത്യൻ ചർച്ചും സംയുക്​തമായി 19ാം നൂറ്റാണ്ട്​ മുതലാണ്​ കാനഡയിൽ ഇത്തരം റസിഡൻഷ്യൽ സ്​കൂളുകൾ ആരംഭിച്ചത്​. സ്വന്തം സംസ്​കാരവുമായി കഴിഞ്ഞ ഗോത്രവർഗക്കാരെ കാനഡയുടെ സംസ്​കാരത്തിലേക്ക്​ സ്വാംശീകരിക്കലായിരുന്നു ഇത്തരം മതപാഠശാലകളുടെ ലക്ഷ്യം.

ഇവരുടെ കുടുംബ ജീവിതവും സാംസ്​കാരിക അസ്​തിത്വവും തകർത്തെന്ന്​ സ്​കൂളുകളെ കുറിച്ച്​ വ്യാപക ആക്ഷേപമുയർന്നിരുന്നു. വിമർശനം രാജ്യത്തിന് പുറത്തും വ്യാപകമായതോടെ 1996ൽ അവസാന റസിഡൻഷ്യൽ സ്​കൂളും പൂട്ടി. പഴയ വിദ്യാർഥികൾ ഈ സ്​ഥാപനങ്ങൾക്കെതിരെ രംഗത്തുവന്നതിന് പിന്നാലെയായിരുന്നു പ്രധാനമന്ത്രി സ്​റ്റീഫൻ ഹാർപറുടെ മാപ്പു പോദിക്കൽ.

1831ൽ ഒ​​ണ്ടേറിയോയിൽ ബ്രാന്റ്​ഫോർഡിലായിരുന്നു ആദ്യ റസിഡൻഷ്യൽ സ്​കൂൾ. കാനഡയുടെ പരിസരത്തെ ന്യൂഫ്രാൻസിൽ കാത്തലിക്​ മിഷനറിമാർ ആരംഭിച്ച സംരംഭമാണ്​ 1830കൾ മുതൽ കാനഡയിലേക്കും വ്യാപിപ്പിച്ചത്​. മറ്റു സഭകളും ഇതിന്റെ ഭാഗമായി. 1930കളിൽ 80 ഓളം റസിഡൻഷ്യൽ സ്​കൂളുകൾ പ്രവർത്തിച്ചിരുന്നു. സ്വന്തം ഗോത്രഭാഷ സംസാരിക്കലും വീട്ടിലേക്ക്​ അതേ ഭാഷയിൽ കത്തയക്കൽ പോലും ഈ വിദ്യാർഥികൾക്ക്​ വിലക്കപ്പെട്ടു. പുതിയ വേഷം നിർബന്ധിതമായി അടിച്ചേൽപിച്ചതിന്​ പുറമെ പേരുമാറ്റവും മതംമാറ്റവും നടന്നു.