കാബൂൾ നഗരത്തിൽ റോക്കറ്റാക്രമണ പരമ്പര; വിമാനത്താവളം ലക്ഷ്യമിട്ട റോക്കറ്റുകൾ തകർത്തെന്ന് യു.എസ്

കാബൂൾ നഗരത്തിന്റെ വിവിധ ഭാഗങ്ങളിൽ റോക്കറ്റാക്രമണ പരമ്പര. ആരാണ് ആക്രമണം നടത്തിയത് എന്ന കാര്യത്തിൽ വ്യക്തതയില്ല. ഐഎസ്-കെ ചാവേറുകളെ നേരിടാനെന്ന പേരിൽ അമേരിക്ക ആക്രമണം നടത്തുന്നുണ്ടെന്നണ് റിപ്പോർട്ടുകൾ. യുഎസ് ആക്രമണത്തിൽ ഒരു വീട്ടിലെ കുട്ടികളടക്കം ഏഴുപേർ കൊല്ലപ്പെട്ടതായി ടോളോ ന്യൂസ് റിപോർട്ട് ചെയ്തു.

അതേസമയം ഒഴിപ്പിക്കൽ പുരോഗമിക്കുന്ന ഹാമിദ്​ കർസായി വിമാനത്താവളം ലക്ഷ്യമി​ട്ടെത്തിയ റോക്കറ്റുകൾ പ്രതിരോധ സംവിധാനം ഉപയോഗിച്ച്​ തകർത്തതായി യു.എസ് അറിയിച്ചു. തിങ്കളാഴ്ച രാവിലെയാണ്​ തുടർച്ചയായി റോക്കറ്റുകൾ വിമാനത്താവളം ലക്ഷ്യമി​ട്ടെത്തിയത്​. ഇവ കാബൂളിലെ സലീം കർവാൻ പ്രദേശത്ത്​ പതിച്ചതായി അധികൃതർ അറിയിച്ചു. ഒന്ന്​ കെട്ടിടത്തിലാണ്​ വീണത്​. ആളപായമില്ലെന്നാണ്​ പ്രാഥമിക റിപ്പോർട്ട്​.

കാബൂളിന്​ വടക്ക്​ ഒരു വാഹനത്തിൽനിന്നാണ്​ ആക്രമണമുണ്ടായതെന്ന്​ സൂചനയുണ്ട്​. രാവിലെ ആദ്യ ആക്രമണം നടന്നതിന്​ പിറകെ കൂടുതൽ​ റോക്കറ്റുകൾ എത്തുകയായിരുന്നു.ഇവക്കു പിന്നിൽ ആരെന്ന്​ വ്യക്​തമല്ല.

അതിനിടെ, കാബൂൾ വിമാനത്താവളം ലക്ഷ്യമിട്ട്​ ആക്രമണത്തിനെത്തിയ ചാവേറിനെ ഡ്രോൺ ആക്രമണത്തിലൂടെ കൊലപ്പെടുത്തിയതായി യു.എസ്​ വൃത്തങ്ങൾ പറഞ്ഞു. വരും ദിവസങ്ങളിലും സമാന ആക്രമണമുണ്ടാകുമെന്നാണ്​ റിപ്പോർട്ട്​.

അതേ സമയം, 31നുള്ളിൽ രാജ്യം വിടാൻ ആഗ്രഹം പ്രകടിപ്പിച്ച അവസാനത്തെ 300 സൈനികരെയും സമയബന്ധിതമായി മടക്കിക്കൊണ്ടുപോകുമെന്ന്​ യു.എസ്​ അറിയിച്ചു. വരുംദിവസങ്ങളിൽ ഐ.എസ്​ ഖുറാസാൻ ആക്രമണം ശക്​തമാക്കാൻ സാധ്യത കണക്കിലെടുത്താണ്​ അതിവേഗത്തിലാക്കുന്നത്​.