ഗസ്സയിൽ താൽക്കാലിക വെടിനിർത്തലിനായി പാരീസിൽ വീണ്ടും തിരക്കിട്ട ചർച്ച

ദുബൈ: കൈറോയിൽ വഴിമുട്ടിയ വെടിനിർത്തൽ കരാർ പാരീസിൽ പുതുജീവൻ പകരാൻ അമേരിക്കയുടെ നേതൃത്വത്തിൽ ഊർജിത നീക്കം. യു.എസ്​ നിർബന്ധത്തെ തുടർന്ന്​ ഇസ്രായൽ സംഘം പാരീസ്​ ചർച്ചകളിൽ സജീവമാണ്​. അറബ്​ സമ്മർദം കണക്കിലെടുത്ത്​ വിശുദ്ധ മാസം ആഗതമാകും മുമ്പ്​ താൽക്കാലിക വെടിനിർത്തൽ നടപ്പാക്കാനുള്ള സാധ്യതകളാണ്​ അമേരിക്ക ആരായുന്നത്​.

സി.ഐ.എ മേധാവിക്കു പുറമെ ഖത്തർ, ഈജിപ്​ത്​ സംഘവും പാരീസിലുണ്ട്​. മിക്കവാറും ഇന്നുതന്നെ ഇസ്രായേൽ സംഘം പാരീസിൽ നിന്ന്​ മടങ്ങുമെന്നാണ്​ വിവരം.വെടിനിർത്തൽ കരാർ രൂപരേഖക്ക്​ ഇസ്രായേലി​െൻറ അനുമതി ലഭിച്ചാൽ ഹമാസി​െൻറ പ്രതികരണം തേടാനാണ്​ മധ്യസ്​ഥ രാജ്യങ്ങളുടെ നീക്കം.

ഗസ്സയിൽ യുദ്ധത്തിന്​ അറുതി വരുത്താനുള്ള മധ്യസ്​ഥ രാജ്യങ്ങളുടെ നടപടികളെ അനുഭാവപൂർണമായാണ്​ നോക്കി കാണുന്നതെന്ന്​ ഹമാസ്​ നേതാവ്​ ഒസാമ ഹംദാൻ പറഞ്ഞു. അതേ സമയം നെതന്യാഹുവി​െൻറ നിക്ഷിപ്​ത രാഷ്​ട്രീയ താൽപര്യങ്ങളാണ്​ കൈറോ ചർച്ച തകരാൻ കാരണമെന്നും ഒസാമ ഹംദാൻ കുറ്റപ്പെടുത്തി. ഗസ്സയിൽ ആക്രമണം മാറ്റമില്ലാതെ തുടരുകയാണ്​ ഇസ്രായേൽ.

ഇന്നലെ മാത്രം നൂറിലേറെ പേർ കൊല്ലപ്പെട്ടു. ഇതോടെ ആകെ മരണസംഖ്യ 29,514 ആയി. ഗസ്സ ഭയാനക ദുരന്തത്തി​െൻറ വക്കിലെന്ന്​ ലോകാരോഗ്യ സംഘടനയുടെ മുന്നറിയിപ്പ്​. യു.എൻ ഏജൻസിയുടെ പിൻവാങ്ങലിനെ തുടർന്ന്​ സഹായവിതരണം നിലച്ചത്​ ഗുരുതര പ്രത്യാഘാതങ്ങളാണ്​ സൃഷ്​ടിക്കുന്നത്​. 7 ലക്ഷം പേരെ പട്ടിണി ഗ്രസിച്ചിരിക്കെ, ഉപരോധം ലംഘിച്ച്​ സഹായം എത്തിക്കാൻ വൈകരു​തെന്ന്​ അറബ്​ മുസ്​ലിം രാജ്യങ്ങളോട്​ ഹമാസ്​ നേതൃത്വം ആവശ്യപ്പെട്ടു.

അതിനിടെ, ഭാവി ഗസ്സയുടെ നിയന്ത്രണം ഇസ്രായേലിനു തന്നെയായിരിക്കുമെന്ന നെതന്യാഹുവി​െൻറ പ്രതികരണം വെടിനിർത്തൽ ചർച്ചാ നീക്കങ്ങൾക്ക്​ തിരിച്ചടിയായി. പാവ ഭരണകൂടത്തെ പ്രതിഷ്​ഠിച്ച്​ ഗസ്സയുടെ നിയന്ത്രണം കൈയടക്കാനുള്ള ഇസ്രായേൽ പദ്ധതിയുടെ വിവരങ്ങൾ നെതന്യാഹു കഴിഞ്ഞ ദിവസം വെളിപ്പെടുത്തിയിരുന്നു.

വെസ്റ്റ് ബാങ്കിൽ 3300ലേറെ പുതിയ കുടിയേറ്റ ഭവനങ്ങൾ നിർമിക്കുമെന്ന ഇസ്രായേൽ പ്രഖ്യാപനം ദോഷം ചെയ്യുമെന്ന്​ അമേരിക്കയും ജർമനിയും വ്യക്​തമാക്കി. 300 വീടുകൾ കെദാറിലും 2350 എണ്ണം മാലി അദുമിമിലും 700 വീട് ഇഫ്റാതിലുമാണ് നിർമിക്കുകയെന്ന്​ ഇസ്രായേൽ അറിയിച്ചിരുന്നു. അനധികൃത കുടിയേറ്റം സ്​ഥിതി വഷളാക്കുമെന്ന്​ യു.എസ്​ സ്​റ്റേറ്റ്​ വകുപ്പും ജർമനിയും പ്രതികരിച്ചു.

ഗസ്സയുടെ ഭൂവിസ്​തൃതി കുറക്കാനുള്ള നീക്കത്തെയും അമേരിക്ക എതിർക്കുമെന്ന്​ യു.എസ്​ സ​്​റ്റേറ്റ്​ സെക്രട്ടറി ആൻറണി ബ്ലിൻകൻ. ഹമാസിനും ഹൂതികൾക്കും എതിരായ നടപടികൾ വിജയം കണ്ടില്ലെന്ന റിപ്പോർട്ടുകളുമായി അന്താരാഷ്​ട്ര മാധ്യമങ്ങൾ. നാലര മാസത്തിലേറെ പിന്നിട്ടിട്ടും ഹമാസി​െൻറ സൈനിക സംവിധാനങ്ങൾ തകർക്കുന്നതിൽ വേണ്ടത്ര വിജയിക്കാനായില്ലെന്ന്​ സൈനിക ഉദ്യോഗസ്​ഥരെ ഉദ്ധരിച്ച്​ ന്യൂയോർക്ക്​ ടൈംസ്​ റിപ്പോർട്ട്​ ചെയ്​തു. ഹൂതികളെ നേരിടുന്നതിൽ കാര്യമായ നേട്ടം ഇനിയും ഉറപ്പാക്കാനായില്ലെന്ന്​ യു.എസ്​ ഉദ്യോഗസ്​ഥരെ ഉദ്ധരിച്ച്​ സി.എൻ എൻ ചാനൽ.