തായ്‍വാനില്‍ ഭൂകമ്പം; ട്രയിനുകള്‍ പാളം തെറ്റി, വ്യാപക നാശനഷ്ടം

തായ്‍പേയ്: തായ്‌വാനിലെ തെക്കുകിഴക്കൻ ഭാഗത്ത് ഞായറാഴ്ച ഉണ്ടായ ഭൂകമ്പത്തില്‍ വ്യാപക നാശനഷ്ടം. 6.8 തീവ്രത രേഖപ്പെടുത്തിയ ഭൂചലനത്തെ തുടര്‍ന്ന് ട്രയിനുകള്‍ പാളം തെറ്റുകയും നിരവധി കടകള്‍ തകരുകയും ചെയ്തു.

ഭൂചലനത്തിന്‍റെ പ്രഭവകേന്ദ്രം ടൈറ്റുങ് കൗണ്ടിയാണെന്നും ശനിയാഴ്ച വൈകുന്നേരം അതേ പ്രദേശത്ത് 6.4 തീവ്രത രേഖപ്പെടുത്തിയ ഭൂചലനത്തെ തുടർന്നാണ് ആളപായമൊന്നും സംഭവിച്ചിട്ടില്ലെന്നും കാലാവസ്ഥാ ബ്യൂറോ അറിയിച്ചു. എന്നാല്‍ ഭൂകമ്പത്തിൽ ഒരാൾ മരിക്കുകയും 146 പേർക്ക് പരിക്കേൽക്കുകയും ചെയ്തതായി തായ്‌വാനിലെ അഗ്നിശമന വിഭാഗം അറിയിച്ചു. യൂലിയിൽ തകർന്ന കെട്ടിടത്തിൽ നിന്ന് നാലുപേരെയും രക്ഷപ്പെടുത്തി, തകർന്ന പാലത്തിൽ നിന്ന് വാഹനങ്ങൾ വീണതിനെ തുടര്‍ന്ന് അപകടത്തിലായ മൂന്ന് പേരെ രക്ഷപ്പെടുത്തി ആശുപത്രിയിൽ പ്രവേശിപ്പിച്ചു.

കിഴക്കൻ തായ്‌വാനിലെ ഡോംഗ്‌ലി സ്റ്റേഷനിൽ പ്ലാറ്റ്‌ഫോമിന്‍റെ ഒരു ഭാഗം തകർന്നതിനെ തുടർന്ന് ആറ് വണ്ടികൾ പാളം തെറ്റിയെന്ന് തായ്‌വാൻ റെയിൽവേ അഡ്മിനിസ്‌ട്രേഷൻ അറിയിച്ചു. ആളപായമില്ലെന്ന് അഗ്നിശമനസേന അറിയിച്ചു. 600-ലധികം ആളുകൾ ചിക്കെ, ലിയുഷിഷി പർവതപ്രദേശങ്ങളിൽ തടസ്സപ്പെട്ട റോഡുകളിൽ കുടുങ്ങിക്കിടക്കുന്നുണ്ടെങ്കിലും പരിക്കുകളൊന്നുമില്ലെന്നും രക്ഷാപ്രവർത്തകർ റോഡുകൾ വീണ്ടും തുറക്കാൻ പ്രവർത്തിക്കുന്നുണ്ടെന്നും വകുപ്പ് അറിയിച്ചു. ഭൂചലനത്തെത്തുടർന്ന് തായ്‌വാനിൽ യുഎസ് പസഫിക് സുനാമി മുന്നറിയിപ്പ് കേന്ദ്രം മുന്നറിയിപ്പ് നൽകിയെങ്കിലും പിന്നീട് മുന്നറിയിപ്പ് പിൻവലിച്ചു. ജപ്പാൻ കാലാവസ്ഥാ ഏജൻസി ഒകിനാവ പ്രിഫെക്ചറിന്‍റെ ഒരു ഭാഗത്ത് സുനാമി മുന്നറിയിപ്പ് പിൻവലിച്ചിട്ടുണ്ട്.

തായ്‌വാനിലുടനീളം ഭൂചലനം അനുഭവപ്പെട്ടതായി കാലാവസ്ഥാ ബ്യൂറോ അറിയിച്ചു. തലസ്ഥാനമായ തായ്‌പേയിൽ കെട്ടിടങ്ങൾ കുറച്ചുനേരം കുലുങ്ങി, തുടർചലനങ്ങൾ ദ്വീപിനെ ഒന്നാകെ കുലുക്കി. 2016ൽ തെക്കൻ തായ്‌വാനിലുണ്ടായ ഭൂകമ്പത്തിൽ നൂറിലധികം പേർ മരിച്ചപ്പോൾ 1999ൽ റിക്ടർ സ്‌കെയിലിൽ 7.3 തീവ്രത രേഖപ്പെടുത്തിയ ഭൂചലനത്തിൽ 2000ലധികം പേർ കൊല്ലപ്പെട്ടിരുന്നു.