ഉപരോധം മറികടന്ന് റഷ്യയെ സഹായിച്ചു; 19 ഇന്ത്യന്‍ കമ്പനികളെ വിലക്കി അമേരിക്ക

വാഷിംഗ്ടണ്‍: റഷ്യക്കെതിരായ ഉപരോധ നിര്‍ദേശം മറികടന്നതിനെ തുടര്‍ന്ന് 19 ഇന്ത്യന്‍ കമ്പനികളടക്കം 400 കമ്പനികള്‍ക്ക് വിലക്കേര്‍പ്പെടുത്തി അമേരിക്ക. യുക്രൈന്‍ യുദ്ധത്തില്‍ റഷ്യയെ സഹായിക്കുന്ന രീതിയില്‍ ഇടപെട്ടുവെന്നാണ് യുഎസിന്‍റെ ആരോപണം. 12 ഓളം രാജ്യങ്ങളില്‍ നിന്നുള്ള കമ്പനികള്‍ക്കെതിരെയാണ് യുഎസ് ട്രഷറി, സ്റ്റേറ്റ് ഡിപ്പാർട്ട്‌മെൻ്റുകൾ നടപടി സ്വീകരിച്ചത്.

2023 മാർച്ചിനും 2024 മാർച്ചിനും ഇടയിൽ റഷ്യ ആസ്ഥാനമായുള്ള കമ്പനികൾക്ക് 700-ലധികം ഷിപ്പ്‌മെൻ്റുകൾ അയച്ച അസെൻഡ് ഏവിയേഷൻ ഇന്ത്യ പ്രൈവറ്റ് ലിമിറ്റഡാണ് വിലക്ക് നേരിട്ട കമ്പനികളിലൊന്ന്. മാസ്ക് ട്രാൻസ്, ടിഎസ്എംഡി ഗ്ലോബൽ പ്രൈവറ്റ് ലിമിറ്റഡ്, മൈക്രോ ഇലക്ട്രോണിക് എന്നീ കമ്പനികൾക്കാണ് വിലക്കേർപ്പെടുത്തിയത്. അതേസമയം റഷ്യയെ സഹായിക്കുന്ന എല്ലാ കമ്പനികൾക്കും അമേരിക്ക മുന്നറിയിപ്പ് നൽകിയിട്ടുണ്ട്. 2023 ജൂൺ മുതൽ ഏപ്രിൽ 2024 വരെ റഷ്യ ആസ്ഥാനമായുള്ള എസ് 7 എൻജിനീയറിംഗ് എൽഎൽസിക്ക് ഏവിയേഷൻ ഘടകങ്ങൾ പോലുള്ള 300,000 ഡോളറിലധികം മൂല്യമുള്ള CHPL ഇനങ്ങള്‍ വിതരണം ചെയ്തതുമായി ബന്ധപ്പെട്ടാണ് മാസ്ക് ട്രാന്‍സിനെ വിലക്കിയത്.

ഡസൻ കണക്കിന് ചൈനീസ്, ഹോങ്കോംഗ്, ഇന്ത്യൻ കമ്പനികൾക്കുള്ള ഉപരോധം ഇതിൽ ഉൾപ്പെടുന്നു. യുഎഇ, തുർക്കി, തായ്‌ലൻഡ്, മലേഷ്യ, സ്വിറ്റ്‌സർലൻഡ് തുടങ്ങിയ രാജ്യങ്ങള്‍ക്കും വിലക്കേര്‍പ്പെടുത്തിയിട്ടുണ്ട്. റഷ്യക്കെതിരായ ആഗോള ഉപരോധം ലംഘിക്കുന്ന ഏതൊരു ഇന്ത്യന്‍ കമ്പനിയും യൂറോപ്പിലെയും അമേരിക്കയിലെയും അവരുടെ ആഗോള സഖ്യകക്ഷികളുമായും വ്യാപാരം നടത്താന്‍ ശ്രമിക്കുമ്പോള്‍ അവര്‍ അഭിമുഖീകരിക്കുന്ന ഫലങ്ങളെ കുറിച്ച് അറിഞ്ഞിരിക്കണമെന്ന് യുഎസ് അംബാസഡര്‍ എറിക് ഗാര്‍സെറ്റി അടുത്തിടെ പറഞ്ഞിരുന്നു.