യുഎഇ തൊഴിലാളികൾക്ക്​ അനുവദിച്ച ഉച്ചവിശ്രമം വ്യാഴാഴ്ച മുതൽ ആരംഭിക്കും

നേരിട്ട്​ വെയിലേൽക്കുന്ന ജോലി ചെയ്യുന്നവർക്ക്​ ഉച്ചക്ക്​ 12.30 മുതൽ മൂന്ന്​ വരെയാണ്​ വിശ്രമം ലഭിക്കുക

ചൂട്​ കൂടിയ സാഹചര്യത്തിൽ യുഎഇ തൊഴിലാളികൾക്ക്​ അനുവദിച്ച ഉച്ചവിശ്രമം വ്യാഴാഴ്ച മുതൽ ആരംഭിക്കും. നേരിട്ട്​ വെയിലേൽക്കുന്ന ജോലി ചെയ്യുന്നവർക്ക്​ ഉച്ചക്ക്​ 12.30 മുതൽ മൂന്ന്​ വരെയാണ്​ വിശ്രമം ലഭിക്കുക. ഇത്​ സെപ്തംബർ 16 വരെ തുടരും.

തുടർച്ചയായ പതിമൂന്നാം വർഷമാണ്​ യു.എ.ഇ മാനവ വിഭവശേഷി, സ്വകാര്യവത്​കരണ മന്ത്രാലയം ഉച്ചവിശ്രമ നിയമം കൊണ്ടുവരുന്നത്​. നിയമപ്രകാരം ജോലി സമയം രാവിലെ, വൈകുന്നേരം എന്നിങ്ങനെ രണ്ട്​ ഷിഫ്​റ്റുകളിലായി വിഭജിക്കും. മൊത്തം ജോലിസമയം എട്ട്​ മണിക്കൂറായിരിക്കും. ഇതിലധികം സമയം ജോലി ചെയ്​താൽ അധിക സമയ ജോലിയായി കണക്കാക്കി പ്ര​േത്യക ആനുകൂല്യം ലഭിക്കും. സാധാരണ ജോലിസമയത്തിനുള്ള കൂലിക്കൊപ്പം 25 ശതമാനമാണ്​ അധികമായി ലഭിക്കുക. രാവിലെ ഒമ്പതിനും വൈകുന്നേരം നാലിനും ഇടയിലാണ്​ അധിക സമയ ജോലി ചെയ്യുന്നതെങ്കിൽ 50 ശതമാനം കൂലിയാണ്​ കൂടുതൽ കിട്ടുക.

കമ്പനികൾ നിയമം പാലിക്കുന്നുണ്ടോ എന്നുറപ്പു വരുത്താൻ വിപുലമായ തോതിലുള്ള പരിശോധക സംഘങ്ങൾക്കും യു.എ.ഇ രൂപം നൽകി. അബൂദബിയിൽ മൂന്നും ദുബൈയിൽ നാലും അൽ​ഐൻ, ഷാർജ, അജ്മാൻ, റാസൽഖൈമ,ഫുജൈറ എന്നിവിടങ്ങളിൽ രണ്ട്​ വീതവും ഉമ്മുൽ ഖുവൈനിൽ ഒരു സംഘത്തെയുമാണ്​ ഇതിനായി നിയോഗിച്ചത്​. സ്മാർട്ട്​ സംവിധാനം ഉപയോഗിച്ചായിരിക്കും സംഘത്തിന്റെ പരിശോധന. യുഎഇയിൽ മൊത്തം 60,000 പരിശോധനകൾ നടത്താനാണ്​ മന്ത്രാലയം ലക്ഷ്യമിടുന്നത്​. തൊഴിലാളികൾക്കിടയിൽ വിപുലമായ ബോധവത്​കരണ പരിപാടികളും അധികൃതർ ആരംഭിച്ചിട്ടുണ്ട്​.