സുരക്ഷാ മേഖലയിൽ കുവൈത്തുമായി തന്ത്രപ്രധാന പങ്കാളിത്തം: ആഭ്യന്തര മന്ത്രി

സുരക്ഷാ മേഖലയിൽ കുവൈത്തുമായി തന്ത്രപ്രധാന പങ്കാളിത്തമാണ്​ ബഹ്റൈനുള്ളതെന്ന്​ ആഭ്യന്തര മന്ത്രി ലഫ്​. ജനറൽ ശൈഖ്​ റാശിദ്​ ബിൻ അബ്​ദുല്ല ആൽ ഖലീഫ വ്യക്​തമാക്കി.

ബഹ്​റൈൻ സന്ദർശനത്തിനെത്തിയ കുവൈത്ത്​ ആഭ്യന്തര മന്ത്രാലയ അണ്ടർ സെക്രട്ടറി ലഫ്​. ജനറൽ അൻവർ അബ്​ദുല്ലത്തീഫ്​ അൽ ബർജാസിനെയും സംഘത്തെയും സ്വീകരിച്ച്​ സംസാരിക്കുകയായിരുന്നു അദ്ദേഹം.

ബഹ്​റൈനിലേക്ക്​ കുവൈത്ത്​ സംഘത്തെ സ്വാഗതം ചെയ്യുകയും പരസ്​പരസ്​പര സഹകരണം വ്യാപിപ്പിക്കുന്നതിനുള്ള ആശയങ്ങൾ പങ്കുവെക്കുകയും ചെയ്​തു. സുരക്ഷാ മേഖലയിൽ സഹകരണം വ്യാപിക്കേണ്ടതിന്‍റെ ആവശ്യകതയിലേക്കും അദ്ദേഹം വിരൽ ചൂണ്ടി. സംയുക്​ത സുരക്ഷാ സമിതി യോഗവും ഇതോടനുബന്ധിച്ച്​ ചേർന്നിരുന്നു. ജി.സി.സി രാഷ്​ട്രങ്ങൾക്കിടയിലുള്ള ബന്ധവും സഹകരണവും ശക്​തമാക്കുന്നതിനുള്ള തീരുമാനത്തിന്‍റെ ഭാഗമായിട്ടായിരുന്നു കുവൈത്ത്​ സംഘത്തിന്‍റെ ബഹ്​റൈൻ സന്ദർശനം.

മയക്കുമരുന്നിനെതിരെ ആഭ്യന്തര മന്ത്രാലയം നടത്തിക്കൊണ്ടിരിക്കുന്ന പ്രവർത്തനങ്ങളെ അൻവർ അബ്​ദുല്ലത്തീഫ്​ അൽ ബർജാസ് പ്രത്യേകം പ്രശംസിക്കുകയും ചെയ്​തു. കൂടിക്കാഴ്ചയിൽ പബ്ലിക്​ സെക്യൂരിറ്റി ചീഫ്​, നാഷണാലിറ്റി, പാസ്​പോർട്ട്​ ആന്‍റ്​ റെസിഡന്‍റ്​സ്​ അഫയേഴ്​സ്​ അണ്ടർ സെക്രട്ടറി, ഇൻസ്​പെക്​ടർ ജനറൽ, ജനറൽ അഡ്​മിനിസ്​ട്രേറ്റർ തുടങ്ങിയവരും സന്നിഹിതരായിരുന്നു.