യുഎഇ പ്രസിഡന്‍റിന് നന്ദിയറിയിച്ച് ജോ ബൈഡൻ

യുഎഇ പ്രസിഡന്‍റ്​ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാന്​ നന്ദിയറിയിച്ച്​ യു.എസ്​ പ്രസിഡന്‍റ്​ ജോ ബൈഡൻ. ജി20 ഉച്ചകോടിയിലെ സുപ്രധാന കൂടിക്കാഴ്ചയ്ക്കിടെ ലോകനേതാക്കൾക്ക്​ മുമ്പിലാണ് ബൈഡൻ ശൈഖ് മുഹമ്മദിനെ പ്രകീർത്തിച്ചത്. യുഎഇ പ്രസിഡന്റ് എന്ന നിലയിൽ ശൈഖ് മുഹമ്മദിന്റെ ആദ്യ ഇന്ത്യ സന്ദർശനമാണിത്.

ഇന്ത്യ- പശ്ചിമേഷ്യ- യൂറോപ്പ്​ സാമ്പത്തിക ഇടനാഴി സംബന്ധിച്ച ​പ്രഖ്യാപനത്തിനിടെയാണ്​ ബൈഡൻ യുഎഇ പ്രസിഡന്റിന് പ്രത്യേക നന്ദിയറിയിച്ചത്​. ​​പ്രധാനമന്ത്രി നരേന്ദ്രമോദി, ഫ്രഞ്ച്​ പ്രസിഡന്റ്​ ഇമ്മാനുവൽ മാക്രോൺ, സൗദി കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാൻ എന്നിവരുടെ സാന്നിധ്യത്തിൽ ആയിരുന്നു ഇത്‌.

ശൈഖ്​ മുഹമ്മദ്​ ഇല്ലായിരുന്നെങ്കിൽ ഇത്തരമൊരു കൂടിയിരുത്തവും പദ്ധതിയുടെ പ്രഖ്യാപനവും ഉണ്ടാകുമായിരുന്നില്ലെന്ന്​ വ്യക്തമാക്കിയാണ്​ ബൈഡൻ നന്ദി പ്രകാശിപ്പിച്ചത്​. മൂന്നു വട്ടം ആവർത്തിച്ച്​ നന്ദി പറയുന്ന വീഡിയോയിൽ മറ്റു ലോക നേതാക്കൾ കൈയടിച്ച്​ ആഹ്ലാദം പ്രകടിപ്പിക്കുന്നതും കാണാം. സാമൂഹിക മാധ്യമങ്ങളിൽ ഏറെ പേർ വീഡിയോ പ​ങ്കുവച്ചിട്ടുമുണ്ട്​.

ന്യൂഡൽഹിയിൽ സമാപിച്ച ഉച്ചകോടിയിൽ വിവിധ ലോകരാഷ്ട്ര നേതാക്കളുമായി ശൈഖ്​ മുഹമ്മദ്​ കൂടിക്കാഴ്ച നടത്തിയിരുന്നു. പ്രധാനമന്ത്രി നരേന്ദ്രമോദിയുമായുള്ള കൂടിക്കാഴ്ചയിൽ ഇന്ത്യ- യു.എ.ഇ സാമ്പത്തിക സഹകരണം ശക്തിപ്പെടുത്താൻ തീരുമാനിച്ചിരുന്നു.