‘200 രൂപ പോലും കിട്ടുന്നില്ല’ അയോധ്യയിൽ ബി.ജെ.പി തോറ്റതിന്റെ കാരണം തുറന്ന് പറഞ്ഞ് ഇ-റിക്ഷാ ഡ്രൈവർമാർ

അയോധ്യ:രാമക്ഷേത്രം ഉയർത്തി തെരഞ്ഞെടുപ്പിനെ​ നേരിട്ട ബി.ജെ.പിക്ക് കനത്തതിരിച്ചടിയായിരുന്നു അയോധ്യ ഉൾപ്പെടുന്ന ഫൈസാബാദ് മണ്ഡലത്തിലെ തോൽവി.എന്തുകൊണ്ട് ബി.ജെ.പിക്കെതിരെ യു.പി അടക്കമുള്ള സംസ്ഥാനങ്ങളിലെ ജനങ്ങൾ വിധിയെഴുതി​യെന്ന് പറയുകയാണ് രാമക്ഷേത്ര നഗരിയിലെ ഇ റിക്ഷാ ഡ്രൈവർമാർ. തെരഞ്ഞെടുപ്പിൽ ബി.ജെ.പിയുടെ ലല്ലു സിംഗിനെ സമാജ്‌വാദി പാർട്ടിയുടെ അവദേശ് പ്രസാദ് സിങ് മികച്ച ഭൂരിപക്ഷത്തിലാണ് പരാജയപ്പെടുത്തിയത്.

തെരഞ്ഞെടുപ്പിന് മുമ്പ് രാമക്ഷേ​ത്രം ഉദ്ഘാടനം ചെയ്തത് യോഗിയും മോദിയുമൊക്കെ സർക്കാർ നേട്ടമായാണ് അവതരിപ്പിച്ചിരുന്നത്. എന്നാൽ ക്ഷേത്രപരിസരത്ത് താമസിക്കുന്നവരും ജോലിചെയ്യുന്നവരും പറയുന്നത് ഒരു ദിവസം 200 രൂപ പോലും സമ്പാദിക്കനാകുന്നില്ലെന്നാണ്.കാ​ര്യമായ വരുമാനമില്ലാത്തത് ജീവിത പ്രതിസന്ധിയുണ്ടാക്കുന്നുവെന്നും അവർ മാധ്യമങ്ങളോട് പറയുന്നു.ഉദ്ഘാടനം നടന്ന ആദ്യ ആഴ്ചകളിൽ തീർത്ഥാടകരും വിനോദസഞ്ചാരികളും ധാരാളമായെത്തിയിരുന്നു.എന്നാൽ ഇപ്പോൾ അതല്ല അവസ്ഥ.പ്രദേശത്തോടുള്ള സർക്കാരി​ന്റെ അവഗണന ഞങ്ങളുടെ ജീവിതത്തെ സാരമായി ബാധിച്ചു.

റോഡ് അടക്കം അടിസ്ഥാന വികസനങ്ങളിലെല്ലാം സർക്കാർ പിന്നോട്ടാണെന്ന് ഡ്രൈവർമാർ പറയുന്നു. ഈ സ്ഥിതി തുടർന്നാൽ മറ്റിടങ്ങളിലും ഫൈസാബാദിന് സമാനമായ അവസ്ഥയു​ണ്ടാകുമെന്നും ഡ്രൈവർമാർ പറയുന്നു. സർക്കാരിൻ്റെ അവഗണനയിൽ അയോധ്യ വികസനത്തിൽ പിന്നോട്ടാണ്. കഴിഞ്ഞ 10 വർഷമായി ഇവിടെ ഞങ്ങൾ റിക്ഷ ഓടിക്കുന്നു. അയോധ്യ നിർമ്മിക്കുന്നതും വികസിപ്പിക്കുന്നതും ഞങ്ങൾ കണ്ടു.എന്നാലും ബി.ജെ.പി സർക്കാർ ജനങ്ങളുടെ അടിസ്ഥാന പ്രശ്നങ്ങളെ അഭിമുഖീകരിക്കു​ന്നില്ല. ബി.ജെ.പി സ്ഥാനാർഥി ഞങ്ങളുടെ ​പ്രശ്നങ്ങ​ളെ അഭിമുഖീകരിച്ചിട്ടില്ല.

ഒരാൾ പോലും ഞങ്ങളെ കേൾക്കാൻ തയാറായിട്ടില്ല. കേന്ദ്ര-സംസ്ഥാന മന്ത്രിമാർ ഇടക്കിടക്ക് വരും, വൻ റാലികൾ നടത്തും പോകും.മാധ്യമങ്ങളിലും സൈബർ ഇടങ്ങളിലും വലിയ വാർത്തയാകും. എന്നാൽ പ്രദേശത്തെ ജനങ്ങളുടെ പ്രശ്നങ്ങളെ കേൾക്കാനോ അവ പരിഹരിക്കാനോ ആരും തയാറാകുന്നില്ലെന്ന് ഡ്രൈവർമാർ പറയുന്നു. ഇത് തുടർന്നാൽ അയോധ്യയിലെ വിധിയാകും മറ്റിടങ്ങളിലും ബി.​ജെ.പിയെ കാത്തിരിക്കുക.

ഞങ്ങളുടെ വരുമാനം ഗണ്യമായി കുറഞ്ഞു. 500 മുതൽ 800 രൂപ വരെ സമ്പാദിച്ചിരുന്നിടത്ത് ഇപ്പോൾ 250 രൂപ പോലും കിട്ടാത്ത ദിവസങ്ങളു​ണ്ടെന്ന് റിക്ഷാതൊഴിലാളികൾ പറയുന്നു. തെരഞ്ഞെടുപ്പ് ഫലം കൂടി തിരിച്ചടിയായതോടെ ജൂൺ നാലിന് ശേഷം അവസ്ഥ കൂടുതൽ മോശമായി. തീർത്ഥാടകരുടെയും വിനോദസഞ്ചാരികളുടെയും എണ്ണത്തിൽ വലിയ കുറവുണ്ടായെന്നും ​ഡ്രൈവർമാർ പറയുന്നു.