നടിയെ ആക്രമിച്ച കേസിലെ ഒമ്പതാം പ്രതിക്ക് പോക്സോ കേസിൽ ജീവപര്യന്തം കഠിന തടവും പിഴയും

പത്തനംതിട്ട: നടിയെ ആക്രമിച്ച കേസിലെ ഒമ്പതാം പ്രതിക്ക് പോക്സോ കേസിൽ ജീവപര്യന്തം കഠിന തടവും 1,25,000 രൂപ പിഴയും വിധിച്ചു. പത്തനംതിട്ട കോഴഞ്ചേരി സ്വദേശി സനൽ കുമാറിനെയാണ് എറണാകുളം പോക്സോ കോടതി ശിക്ഷിച്ചത് . 2013ലായിരുന്നു കേസിനാസ്പദമായ സംഭവം.

14 വയസുള്ള പെൺകുട്ടിയെ പ്രതി എറണാകുളത്തു നിന്ന് തട്ടിക്കൊണ്ടുപോയി പഴനിയിലെ ലോഡ്ജിൽ എത്തിച്ച് നിരവധി തവണ ബലാത്സംഗം ചെയ്തെന്നാണ് കേസ് . നേരത്തെ മരട് പൊലീസ് രജിസ്റ്റർ ചെയ്ത വിവാഹത്തട്ടിപ്പ് കേസിൽ റിമാൻഡിലായ സനൽകുമാർ ഈ സമയത്താണ് പൾസർ സുനിയെ പരിചയപ്പെടുന്നതും സുനി ദിലീപിനെ വിളിച്ച മൊബൈൽ ഒളിപ്പിക്കുന്നതിനായി സഹായിക്കുന്നതും. പിന്നീട് പ്രതിയുടെ വീട്ടിൽ നിന്ന് മൊബൈൽ അന്വേഷണ സംഘം കണ്ടെത്തി.