അസ്‍ലന്‍ഷാ ഹോക്കി: ഇന്ത്യക്ക് തോല്‍വി
Update: 2018-04-21 03:41 GMT
സുല്‍ത്താന്‍ അസ്‌ലാന്‍ഷാ ഹോക്കിയില്‍ ഇന്ത്യക്കു പരാജയം
സുല്‍ത്താന്‍ അസ്‌ലാന്‍ഷാ ഹോക്കിയില്‍ ഇന്ത്യക്കു പരാജയം. ന്യൂസിലന്‍ഡിനോട് ഒന്നിനെതിരേ രണ്ടു ഗോളുകള്‍ക്കാണ് ഇന്ത്യ തോല്‍വി വഴങ്ങിയത്. ഇതോടെ ഇന്ത്യ പോയിന്റ് പട്ടികയില്‍ മൂന്നാം സ്ഥാനത്തേക്കു താഴ്ന്നു. പൂള്‍ ഘട്ടത്തിലെ അവസാന മത്സരത്തില്‍ മലേഷ്യയെ കീഴടക്കിയാല്‍ ഇന്ത്യക്കു ഫൈനലില്‍ പ്രവേശിക്കാന്‍ കഴിയും.
29-ാം മിനിറ്റില്‍ കേയ്ന്‍ റസലിലൂടെ ന്യൂസിലന്‍ഡ് മുന്നിലെത്തിയെങ്കിലും 36-ാം മിനിറ്റില്‍ മന്‍ദീപ് സിങ് നേടിയ ഗോളിലൂടെ ഇന്ത്യ സമനില പിടിച്ചു. എന്നാല്‍ 41-ാം മിനിറ്റില്‍ നിക് വില്‍സണ്‍ നേടിയ ഗോളിലൂടെ വീണ്ടും മുന്നിലെത്തിയ കിവീസ് വലയില്‍ ഒരിക്കല്‍കൂടി പന്തെത്തിക്കാന്‍ ഇന്ത്യക്ക് കഴിഞ്ഞില്ല. അനുകൂലമായി ലഭിച്ച മൂന്ന് പെനാല്‍റ്റി കോര്‍ണറുകള്‍ പാഴാക്കിയതും ഇന്ത്യക്ക് തിരിച്ചടിയായി. നിലവിലെ ചാമ്പ്യന്‍മാരായ ആസ്‌ട്രേലിയയാണ് പോയിന്റ് പട്ടികയില്‍ ഒന്നാം സ്ഥാനത്ത്. ജയത്തോടെ ന്യൂസിലന്‍ഡ് ഇന്ത്യയെ മറികടന്ന് രണ്ടാം സ്ഥാനത്തെത്തി.