'മഞ്ജു വാര്യര്‍ ചിത്രത്തിന് ഒഴികെ മറ്റെല്ലാ ചിത്രത്തിന്‍റെയും പകര്‍പ്പാവകാശം എനിക്ക് മാത്രം'; ജോജു ജോര്‍ജിനെതിരെ സനല്‍ കുമാര്‍ ശശിധരന്‍

'ഒരാൾപൊക്കം' മുതൽ 'ചോല' വരെയുള്ള തന്‍റെ എല്ലാ ചിത്രങ്ങളുടെയും യഥാര്‍ത്ഥ ഉള്ളടക്ക സൃഷ്ടാവ് താന്‍ മാത്രമാണെന്ന് സംവിധായകന്‍ സനല്‍ കുമാര്‍ ശശിധരന്‍. ചോലയുടെ തമിഴ് പതിപ്പായ 'അല്ലി'യുടെ പോസ്റ്റര്‍ പങ്കുവെച്ചാണ് സനല്‍ കുമാര്‍ ശശിധരന്‍ വിശദീകരണം നല്‍കിയത്. തന്‍റെ അനുവാദമില്ലാതെ ജോജു ജോര്‍ജ് 'ചോല' സിനിമയുടെ വില്‍പ്പന നടത്തിയതായി സനല്‍ നേരത്തെ ആരോപിച്ചിരുന്നു. 'ചോല' പൂഴ്ത്തി വെയ്ക്കാൻ ശ്രമങ്ങൾ നടക്കുന്നു എന്ന് പോസ്റ്റ് ഇട്ടതിൽ പ്രകോപിതനായി ജോജു ജോർജ്ജ് ഫോണിൽ വിളിച്ച് ചീത്ത വിളിക്കുകയും വീട്ടിൽ വന്ന് തല്ലുമെന്ന് ഭീഷണിപ്പെടുത്തുകയും ചെയ്തതായും സനല്‍ ആരോപിച്ചിരുന്നു. ഇതിന് പിന്നാലെയാണ് തന്‍റെ സിനിമകളുടെ പകര്‍പ്പാവകാശം സംബന്ധിച്ച് വിശദീകരണ കുറിപ്പുമായി രംഗത്തുവന്നത്.

'ഒരാൾപൊക്കം' ക്രൗഡ് ഫണ്ടിംഗ് ഉപയോഗിച്ച് നിർമ്മിച്ച് റിലീസ് ചെയ്തതിനാല്‍ അഞ്ച് വർഷത്തിന് ശേഷം പകർപ്പവകാശം സൗജന്യമായി നൽകാമെന്ന് ചിത്രീകരണ സമയത്തേ തീരുമാനിച്ചതാണ്. 'കയറ്റം' എന്ന സിനിമയിൽ എന്‍റെ പകർപ്പവകാശം കൈമാറ്റം ചെയ്യുന്നതിനായി മഞ്ജു വാര്യരുമായി ഉണ്ടാക്കിയ കരാറൊഴികെ മറ്റൊരു സിനിമയ്ക്കും ആരുമായും പകർപ്പവകാശ കൈമാറ്റ കരാറുകൾ നിലവിലില്ലെന്നും സനല്‍ കുമാര്‍ വ്യക്തമാക്കി.

2019ൽ തനിക്കും തന്‍റെ സിനിമകൾക്കുമെതിരായ ആസൂത്രിത അക്രമങ്ങൾക്ക് ശേഷം 'ഒഴിവുദിവസത്തെ കളി' മുതൽ 'കയറ്റം' വരെയുള്ള എല്ലാ സിനിമകളും കുഴിച്ചുമൂടാനുള്ള നീക്കങ്ങൾ നടന്നതായും തന്നോട് ആലോചിക്കാതെ 'ചോല'യുടെ അന്താരാഷ്ട്ര വിതരണം നിർത്തണമെന്ന് ആവശ്യപ്പെട്ട് ജോജു സെയിൽസ് ഏജന്‍റിന് കത്ത് അയച്ചതായും സനല്‍ പറയുന്നു. ഇക്കാര്യത്തില്‍ തെളിവുകൾ സഹിതം പിന്നീട് എഴുതുമെന്നും സനല്‍ കുമാര്‍ ശശിധരന്‍ ഫേസ്ബുക്ക് കുറിപ്പില്‍ പറഞ്ഞു.

സനല്‍ കുമാര്‍ ശശിധരന്‍റെ ഫേസ്ബുക്ക് കുറിപ്പ്:

ഇതൊരു പൊതു അറിയിപ്പാണ്:

'ഒരാൾപൊക്കം' മുതൽ 'ചോല' വരെയും ചോലയുടെ തമിഴ് പതിപ്പായ 'അല്ലി' യുടെയും, ഞാൻ സംവിധാനം ചെയ്ത ചിത്രങ്ങളിലൊന്നും എന്‍റെ അവകാശം സംബന്ധിച്ച് ഞാൻ ആരുമായും കരാറിൽ ഒപ്പുവെച്ചിട്ടില്ല. 'ഒരാൾപൊക്കം' ക്രൗഡ് ഫണ്ടിംഗ് ഉപയോഗിച്ചാണ് നിർമ്മിച്ചത്, റിലീസ് ചെയ്ത് അഞ്ച് വർഷത്തിന് ശേഷം പകർപ്പവകാശം സൗജന്യമായി നൽകാമെന്നും അതനുസരിച്ച് ആ സിനിമയുടെ പകർപ്പവകാശം ഇപ്പോൾ മുഴുവൻ പൊതുജനങ്ങളുടേതുമായിരിക്കുമെന്ന് നിർമാണ സമയത്ത് തന്നെ തീരുമാനിച്ചതാണ്. 2019ൽ എനിക്കും എന്‍റെ സിനിമകൾക്കുമെതിരായ ആസൂത്രിത അക്രമങ്ങൾക്ക് ശേഷം 'ഒഴിവുദിവസത്തെ കളി' മുതൽ 'കയറ്റം' വരെയുള്ള എല്ലാ സിനിമകളും കുഴിച്ചുമൂടാനുള്ള നീക്കങ്ങൾ നടന്നിട്ടുണ്ട്. എന്നോട് ആലോചിക്കാതെ 'ചോല' എന്ന സിനിമയുടെ അന്താരാഷ്ട്ര വിതരണം നിർത്തണമെന്ന് ആവശ്യപ്പെട്ട് ജോജു ജോർജ് സെയിൽസ് ഏജന്‍റിന് അയച്ച കത്താണ് ഏറ്റവും പുതിയ തെളിവ്. ആവശ്യമെങ്കിൽ തെളിവുകൾ സഹിതം ഇതിനെക്കുറിച്ച് പിന്നീട് എഴുതാം. ഇപ്പോൾ ഞാൻ ഇത് എഴുതുന്നത് മറ്റൊരു കാരണത്താലാണ്.

എന്‍റെ എല്ലാ സിനിമകളുടെയും യഥാർത്ഥ ഉള്ളടക്ക സൃഷ്ടാവ് ഞാനാണ്. അവരുടെ സെൻസർ സർട്ടിഫിക്കറ്റുകൾ ഈ വസ്തുതയുടെ അനിഷേധ്യമായ തെളിവുകളാണ്. യഥാർത്ഥ സൃഷ്ടാവ് എന്ന നിലയിൽ, മറ്റേതെങ്കിലും കരാറുകളുടെ അഭാവത്തിൽ ഞാൻ പൂർണ്ണ പകർപ്പവകാശം നിലനിർത്തുന്നു. 'കയറ്റം' എന്ന സിനിമയിൽ എന്‍റെ പകർപ്പവകാശം കൈമാറ്റം ചെയ്യുന്നതിനായി മഞ്ജു വാര്യരുമായി ഉണ്ടാക്കിയ കരാറൊഴികെ, മറ്റൊരു സിനിമയ്ക്കും ആരുമായും പകർപ്പവകാശ കൈമാറ്റ കരാറുകൾ നിലവിലില്ല. വിവിധ നിർമാതാക്കൾ എന്നോടൊപ്പം എത്തിയ വാക്കാലുള്ള കരാറുകൾ പൂർത്തീകരിച്ചതിന് ശേഷം ഒരു രേഖാമൂലമുള്ള കരാർ വഴി ഞാൻ എന്‍റെ പകർപ്പവകാശം എഴുതി കൈമാറുന്നതുവരെ നിയമപരമായി ഇതാണ് സ്ഥിതി. ഈ സാഹചര്യത്തിൽ എന്‍റെ അറിവോ സമ്മതമോ കൂടാതെ 'കയറ്റം' ഒഴികെയുള്ള എന്‍റെ സിനിമകളുടെ ഏതെങ്കിലും വിൽപ്പനയോ കരാറോ പകർപ്പാവകാശ നിയമപ്രകാരം അസാധുവാണെന്ന് ഇതിനാൽ പരസ്യമാക്കുന്നു.