അയ്യോ കേശുവേട്ടനെ പരിചയമില്ലേ? പൊട്ടിച്ചിരിപ്പിച്ച് കേശു ഈ വീടിന്‍റെ നാഥന്‍ ട്രയിലര്‍
ഡിസ്‌നി പ്ലസ് ഹോട്‌സ്റ്റാറില്‍ ഡിസംബര്‍ 31ന് ആണ് ചിത്രം റിലീസ് ചെയ്യുന്നത്
Update: 2021-12-15 03:12 GMT
ദീലിപ്-നാദിര്‍ഷ കൂട്ടുകെട്ടിലൊരുങ്ങുന്ന കേശു ഈ വീടിന്‍റെ നാഥന്‍ എന്ന ചിത്രത്തിന്റെ ട്രയിലര്‍ പുറത്തിറങ്ങി. പൊട്ടിച്ചിരിപ്പിക്കുന്ന ഒരുപാട് രംഗങ്ങള്‍ കോര്‍ത്തിണക്കിയ ട്രയിലര്‍ പ്രേക്ഷകര്‍ക്ക് ഒരു ചിരിവിരുന്നാണ് സമ്മാനിക്കുന്നത്. മമ്മൂട്ടി, മോഹന്‍ലാല്‍, ജയറാം, സുരേഷ് ഗോപി എന്നിവരുടെ ഫേസ്ബുക്ക് പേജ് വഴിയാണ് ട്രയിലര്‍ റിലീസ് ചെയ്തിരിക്കുന്നത്. ഡിസ്‌നി പ്ലസ് ഹോട്‌സ്റ്റാറില്‍ ഡിസംബര്‍ 31ന് ആണ് ചിത്രം റിലീസ് ചെയ്യുന്നത്.
ടൈറ്റില്‍ കഥാപാത്രത്തിലെത്തുന്ന ദിലീപിനൊപ്പം ഉര്‍വശിയും കട്ടക്ക് തകര്‍ക്കുന്നുണ്ട്. ദിലീപിന്‍റെ ഭാര്യയായിട്ടാണ് ഉര്‍വശിയെത്തുന്നത്. 60 വയസുള്ള കഥാപാത്രത്തെയാണ് ദിലീപ് അവതരിപ്പിക്കുന്നത്. ചിത്രത്തിലെ ദിലീപിന്‍റെ ഗെറ്റപ്പ് നേരത്തെ തന്നെ ശ്രദ്ധ നേടിയിരുന്നു. സജീവ് പാഴൂർ ആണ് ചിത്രത്തിനു തിരക്കഥ ഒരുക്കിയിരിക്കുന്നത്. ഹരിശ്രീ അശോകന്‍,ജാഫര്‍ ഇടുക്കി,കോട്ടയം നസീര്‍,കലാഭവന്‍ ഷാജോണ്‍, ഹരീഷ് കണാരന്‍,അനുശ്രീ,സ്വാസിക എന്നിവരാണ് ചിത്രത്തിലെ മറ്റു താരങ്ങള്‍. ക്യാമറ-അനില്‍ നമ്പ്യാര്‍. ദിലീപും ഡോ.സക്കറിയാ തോമസും ചേര്‍ന്നാണ് ചിത്രം നിര്‍മിക്കുന്നത്.