വിമാന ടിക്കറ്റില്‍ 24% നിരക്കിളവുമായി ജെറ്റ് എയര്‍വേസ്
Update: 2018-05-31 00:39 GMT
ജെറ്റ് എയര്‍വെയ്‌സിന്റെ 24 ാം വാര്‍ഷികാഘോഷങ്ങളുടെ ഭാഗമായി പ്രത്യേക ഓഫറുകള്‍ പ്രഖ്യാപിച്ചു. ആഭ്യന്തര അന്താരാഷ്ട്ര സര്‍വ്വീസുകളില്‍ നിരക്കിളവ് ലഭ്യമാകും
ജെറ്റ് എയര്‍വെയ്‌സിന്റെ 24 ാം വാര്‍ഷികാഘോഷങ്ങളുടെ ഭാഗമായി പ്രത്യേക ഓഫറുകള്‍ പ്രഖ്യാപിച്ചു. ആഭ്യന്തര അന്താരാഷ്ട്ര സര്‍വ്വീസുകളില്‍ നിരക്കിളവ് ലഭ്യമാകും. ഇന്ന് ടിക്കറ്റ് ബുക്ക് ചെയ്യുന്ന അന്താരാഷ്ട്ര യാത്രക്കാര്‍ക്ക് ഇക്കണോമി, പ്രീമിയര്‍ ക്ലാസുകളില്‍ ബേസ് ഫെയറിന്റെ 24 ശതമാനം ഡിസ്‌കൗണ്ടാണ് കമ്പനി അനുവദിക്കുന്നത്.
ദോഹ ഉള്‍പ്പെടെയുള്ള ഗള്‍ഫ് നഗരങ്ങളില്‍ നിന്ന് കേരളത്തിലേക്ക് നേരിട്ട് സര്‍വ്വീസ് നടത്തുന്ന ജെറ്റ് എയര്‍വെയ്‌സ് ഇപ്പോള്‍ പ്രഖ്യാപിച്ചിരിക്കുന്ന വാര്‍ഷികാഘോഷ നിരക്കിളവ് ആഭ്യന്തര അന്താരാഷ്ട്ര സര്‍വ്വീസുകളില്‍ ലഭ്യമാകും. അടിസ്ഥാന ടിക്കറ്റ് നിരക്കിന്റെ 24 ശതമാനം ഇളവാണ് ഗള്‍ഫില്‍ നിന്നടക്കമുള്ള അന്താരാഷ്ട്ര സര്‍വ്വീസുകളില്‍ ലഭിക്കുക. മെയ് 5 ന് ബുക്ക് ചെയ്യുന്ന ടിക്കറ്റുകളിലാണ് ഈ നിരക്കിളവ് ലഭിക്കുക. എന്നാല്‍ ജൂണ്‍ 16 മുതലുള്ള യാത്രാ തിയ്യതിയാണ് നിരക്കിളവിനായി പരിഗണിക്കപ്പെടുക.
ആഭ്യന്തര സര്‍വ്വീസുകളില്‍ തെരഞ്ഞെടുക്കപ്പെട്ട സെക്ടറുകളില്‍ ഇക്കണോമി യാത്രക്കാര്‍ക്ക് മികച്ച ഓഫറും ലഭ്യമാക്കിയിട്ടുണ്ട്. ജെറ്റ് എയര്‍വെയ്‌സിന്റെ ആഭ്യന്തര അന്താരാഷ്ട്ര സെക്ടറുകളില്‍ നേരിട്ട് യാത്ര ചെയ്യുന്നവര്‍ക്ക് മാത്രമേ ഈ ആനുകൂല്യം ലഭ്യമാവുകയുള്ളു. 2017 ലെ ട്രിപ് അഡൈ്വസര്‍ ബെസ്റ്റ് ഇന്ത്യന്‍ എയര്‍ലൈന്‍ അവാര്‍ഡ് നേടിയ ജെറ്റ് എയര്‍വെയ്‌സിന്റെ ആകര്‍ഷകമായ നിരക്കിളവുകള്‍ അവധിക്കാലം ആഘോഷിക്കാനായി നാട്ടിലേക്ക് പോകുന്ന പ്രവാസികള്‍ക്കാണ് കൂടുതല്‍ ഗുണകരമാവുക.