എം.കെ മുനീറിന് യു.എ.ഇ ​ഗോൾഡൻ വിസ

ദുബൈ: എം.കെ. മുനീർ എം.എൽ.എയ്ക്ക്​ യു.എ.ഇയുടെ ഗോൾഡൻ വിസ. ആദ്യമായാണ്​ കേരളത്തിലെ എം.എൽ.എയ്ക്ക്​ ഗോൾഡൻ വിസ ലഭിക്കുന്നത്​​. ദുബൈയിൽ നടന്ന ചടങ്ങിൽ അദ്ദേഹം പത്ത്​ വർഷത്തെ ഗോൾഡൻ വിസ ഏറ്റുവാങ്ങി.

യു.എ.ഇയിൽ സന്ദർശനത്തിനെത്തിയതാണ്​ എം.എൽ.എ. വിവിധ മേഖലകളിലെ പ്രമുഖർക്കാണ്​ യു.എ.ഇ ഗോൾഡൻ വിസ നൽകുന്നത്​. ​ഗോൾഡൻ വിസ നൽകിയ യു.എ.ഇക്ക് നന്ദിയറിയിച്ച് എം.കെ മുനീർ രം​ഗത്തെത്തി. ഫേസ്ബുക്കിലൂടെയാണ് മുനീറിന്റെ പ്രതികരണം.

അനുദിനം ലോകത്തിന്റെ നെറുകയിലേക്ക് വളർന്നു കൊണ്ടിരിക്കുന്ന ഏറ്റവും സുന്ദരമായ ഒരു രാജ്യമാണ് യു.എ.ഇ. സ്നേഹമെന്ന വികാരം എത്ര മനോഹരമായാണ് ഇമറാത്തികൾ പ്രകടിപ്പിക്കുന്നത്. സ്വദേശിയെന്നോ വിദേശിയെന്നോ വ്യത്യാസമില്ലാതെ എല്ലാവരെയും ചേർത്തുനിർത്തുന്ന യു.എ.ഇ ലോകത്തിന് മാതൃകയാണ്- മുനീർ പറഞ്ഞു.

ഗോൾഡൻ വിസ ലഭിച്ചതിൽ യു.എ.ഇ ഭരണാധികാരികൾക്കും യു.എ.ഇക്കാരായ സഹോദരങ്ങൾക്കും കടപ്പാടും സ്നേഹവും അറിയിക്കുന്നു. നന്ദി യുഎഇ- മുനീർ കുറിച്ചു.