പുതുവർഷാഘോഷത്തിന്റെ ഭാഗമായി തൊഴിലാളികൾക്ക് സമ്മാനങ്ങൾ കൈമാറി ദുബൈ അധികൃതർ

ദുബൈ: പുതുവർഷാഘോഷത്തിന്റെ ഭാഗമായി തൊഴിലാളികൾക്ക്​ സമ്മാനങ്ങൾ കൈമാറി ദുബൈ അധികൃതർ. വിവിധ ലേബർ ക്യാമ്പുകളിൽ നടന്ന ആഘോഷ പരിപാടികളിൽ ആയിരുന്നു സമ്മാനവിതരണം. തൊഴിലാളികളുടെ ജീവിത നിലവാരം മെച്ചപ്പെടുത്താൻ ശക്തമായ നടപടികൾ തുടരുമെന്നും തൊഴിൽ വിഭാഗം അധികൃതർ അറിയിച്ചു.

മൂന്നു കാറുകൾ, നിരവധി സ്മാർട്ട്​ ഫോണുകൾ എന്നിവ സമ്മാനമായി നൽകിയായിരുന്നു ദുബൈ​ പെർമനന്‍റ്​ കമ്മിറ്റി ഓഫ് ലേബർ അഫയേഴ്സിന്റെ ആഘോഷ പരിപാടികൾ. അൽഖൂസ്​, മുഹൈസിന, ജബൽ അലി, ഓർലയൻസ്, ജുമൈറ ഒന്ന്, അൽ ബദാ തുടങ്ങിയ സ്ഥലങ്ങളിലെ ലേബർ ക്യാമ്പുകൾ കേന്ദ്രീകരിച്ചായിരുന്നു പരിപാടികൾ. പങ്കെടുത്ത ഒരു ലക്ഷത്തിലധികം പേരിൽ നിന്ന്​ നറുക്കെടുപ്പിലൂടെ വിജയിച്ചവർക്കായിരുന്നു സമ്മാനവിതരണം.

അൽ​ഖൂസിലായിരുന്നു പ്രധാന ആഘോഷ​പരിപാടി. ദുബൈ പെർമനന്‍റ്​ കമ്മിറ്റി ഓഫ് ലേബർ അഫയേഴ്സ് ചെയർമാൻ മേജർ ജനറൽ ഉബൈദ് മുഹൈർ ബിൻ സുറൂർ, സെക്രട്ടറി ജനറൽ അബ്ദുല്ല ലഷ്കരി തുടങ്ങിയവർ സംബന്ധിച്ചു. ഇന്ത്യ ഉൾപ്പെടെ വിവിധ രാജ്യങ്ങളിൽ നിന്നുള്ള തൊഴിലാളികളുടെ സന്തോഷപ്രദമായ ജീവിതമാണ്​ പ്രധാനമെന്ന്​ ദുബൈ തൊഴിൽ​കാര്യ വകുപ്പ് സ്ഥിരം സമിതി സെക്രട്ടറി ജനറൽ അബ്ദുല്ല ലഷ്കരി പറഞ്ഞു.