ഒറ്റത്തവണ മാത്രം ഉപയോഗിക്കാവുന്ന പ്ലാസ്റ്റിക് ക്യാരി ബാഗുകൾക്ക് ദുബൈയിൽ തിങ്കളാഴ്ച മുതൽ നിരോധനം

ദുബൈ: ഒറ്റത്തവണ മാത്രം ഉപയോഗിക്കാവുന്ന പ്ലാസ്റ്റിക് ക്യാരി ബാഗുകൾക്ക് ദുബൈയിൽ തിങ്കളാഴ്ച മുതൽ​ നിരോധനം​. ഒറ്റത്തവണ ഉപയോഗിച്ച്​ ഒഴിവാക്കുന്ന പ്ലാസ്റ്റിക്​ കവറുകളുടെ ഇറക്കുമതിക്കും വിപണനത്തിനുമാണ്​ വിലക്ക്. ദുബൈ കിരീടാവകാശിയും യു.എ.ഇ എക്സിക്യുട്ടീവ്​ കൗൺസിൽ ചെയർമാനുമായ ശൈഖ്​ ഹംദാൻ ബിൻ റാശിദ്​ ആൽ മക്തൂമാണ് ഞായറാഴ്ച​ ഇതു സംബന്ധിച്ച പ്രഖ്യാപനം നടത്തിയത്​.

2023ന്‍റെ തുടക്കത്തിൽ മുഴുവൻ എമിറേറ്റുകളിലും പുനരുപയോഗിക്കാൻ കഴിയാത്ത പ്ലാസ്റ്റിക്​ ക്യാരിബാഗുകൾ നിരോധിക്കാൻ​ സർക്കാർ തീരുമാനിച്ചിരുന്നു. ഇതുപ്രകാരം ജനുവരി മുതൽ ഓരോ എമിറേറ്റും തുടർ നടപടി സ്വീകരിക്കും. ദുബൈയിൽ തിങ്കളാഴ്ച മുതൽ നിരോധനം പ്രാബല്യത്തിൽ വരുമെന്ന്​​വാർത്ത ഏജൻസിയായ വാം റിപോർട്ട്​ ചെയ്തു​. എന്നാൽ, പുനരുപയോഗിക്കാൻ കഴിയുന്ന പ്ലാസ്റ്റിക്കുകൾ കൊണ്ട്​ നിർമിക്കുന്ന ബാഗുകൾക്കും കയറ്റുമതി ചെയ്യുന്ന പ്ലാസ്റ്റിക്കുകൾക്കും നിരോധനമില്ല.

പരിസ്ഥിതി സൗഹൃദ നടപടികളുടെ ഭാഗമായി രാജ്യത്ത്​ പ്ലാസ്റ്റിക്​ ഉത്പന്നങ്ങളുടെ ഉപയോഗവും വിപണനവും ഘട്ടം ഘട്ടമായി നിരോധിക്കാനാണ്​ യു.എ.ഇ സർക്കാർ ലക്ഷ്യമിടുന്നത്​.

ഇതിന്‍റെ ഭാഗമായി 2025 മുതൽ ടേബിൾ കവർ, കപ്പുകൾ, സ്റ്റിറോഫോം ഫുഡ്​ കണ്ടെയ്നർ, പ്ലാസ്റ്റിക്​​ സ്ട്രോകൾ, ​ കോട്ടൻ ബഡ്സ്​, പ്ലാസ്റ്റിക്​ സ്റ്റിറേഴ്സ്​ ഉൾപ്പെടെയുള്ള ഉത്പന്നങ്ങളും നിരോധിക്കും. പ്ലാസ്റ്റിക്​ പ്ലേറ്റുകൾ, ഫുഡ്​ കണ്ടെയ്നറുകൾ, ടേബിൾ വിരികൾ, കുടിവെള്ള കുപ്പികൾ അവയുടെ മൂടികൾ എന്നിവ 2026 മുതൽ നിരോധിക്കാനാണ്​ തീരുമാനം. നിയമം ലംഘിച്ചാൽ 200 ദിർഹമാണ്​ പിഴ. ഒരു വർഷത്തിനിടെ നിയമലംഘനം ആവർത്തിച്ചാൽ ഓരോ തവണക്കും ഇരട്ടി പിഴ ഈടാക്കും.

ഇങ്ങനെ പരമാവധി 2000 ദിർഹം വരെയാണ്​ പിഴ. പ്ലാസ്റ്റിക്​ നിരോധനത്തിന്‍റെ തുടക്കമെന്ന നിലയിൽ 2022ൽ ദുബൈ പ്ലാസ്റ്റിക്​ ബാഗുകൾക്ക്​ 25 ഫിൽസ്​ ഈടാക്കിയപ്പോൾ അബൂബദിയിൽ പൂർണ നിരോധനം ഏർപ്പെടുത്തിയിരുന്നു. എന്നാൽ, മാംസം, മത്സ്യം, പച്ചക്കറികൾ, പഴം, ധാന്യങ്ങൾ, ബ്രഡ്​ എന്നിവക്കൊപ്പം ചവറ്റുകൊട്ടകളിൽ ഉപയോഗിക്കുന്ന കട്ടി കുറഞ്ഞ ഫിലിം റൂളുകൾ കൊണ്ടുള്ള പ്ലാസ്റ്റിക്​ കവറുകൾക്ക്​ നിരോധനം ബാധകല്ല.