യു.എ.ഇയില്‍ ചില നെറ്റ്‍വര്‍ക്കുകളില്‍ വാട്സ്ആപ്പ് കോള്‍ സേവനം ലഭ്യമായിത്തുടങ്ങി

യു.എ.ഇയിലെ ചില നെറ്റ്​വർക്കുകളിൽ വാട്​സാപ്​​ കോളുകൾ ലഭ്യമായിത്തുടങ്ങി. എന്നാൽ, എല്ലാ നെറ്റ്​വർക്കുകളിലും സേവനം ലഭ്യമല്ല. നേരത്തെ യു.എ.ഇയിൽ വാട്​സാപ്​ ഓഡിയോ, വിഡിയോ കോളുകൾ പൂർണമായും നിരോധിച്ചിരിക്കുകയായിരുന്നു.

ഈ നിയന്ത്രണങ്ങള്‍​ മാറുന്നതിന്‍റെ സൂചനയാണ്​ പുതിയ നീക്കമെന്ന്​ കരുതുന്നു. എക്​സ്​പോ 2020 തുടങ്ങിയതോടെ ലോകത്തി​ന്‍റെ വിവിധ ഭാഗങ്ങളിലുള്ളവർ യു.എ.ഇയിൽ എത്തിയിട്ടുണ്ട്​. ഇവർക്ക്​ ഏറെ ഉപകാരപ്പെടുന്നതാണ്​ തീരുമാനം. എക്​സ്​പോ സൈറ്റിൽ നിന്നും വാട്​സാപ്പ്​ കോൾ ചെയ്യാൻ കഴിയുന്നുണ്ടെന്ന്​ സന്ദർശകർ പറയുന്നു.

സുരക്ഷ മുൻനിർത്തിയാണ്​ വോയിസ്​ ഓവർ ഇൻറർനെറ്റ്​ പ്രോ​ട്ടോകോൾ (വി.​ഒ.​ഐ.പി) സർവിസുകളിൽ ഭൂരിഭാഗവും യു.എ.ഇയിൽ നിരോധിച്ചത്​. ടെലികമ്യൂണിക്കേഷൻ ആൻഡ്​ ഡിജിറ്റൽ ഗവൺമെൻറ്​ അതോറിറ്റിയാണ്​ നിരോധനം ഏർപ്പെടുത്തിയത്​.

എന്നാൽ, കോവിഡ് കാലത്ത്​ ഇവയിൽ ചിലത്​ പ്രവര്‍ത്തനക്ഷമമായിരുന്നു. മൈക്രോസോഫ്​റ്റ്​ ടീംസ്​, സൂം, സ്​കൈപ്​ പോലുള്ളവക്ക്​ കോവിഡ്​ സമയത്ത് അനുമതി നൽകിയിരുന്നു. ഇപ്പോഴും ഇവക്ക്​ അനുമതിയുണ്ട്​. കുട്ടികളുടെ ഓൺലൈൻ പഠനം മുൻനിർത്തിയാണ്​ ഇവക്ക്​ അനുമതി നൽകിയത്​. അപ്പോഴും വാട്​സാപ്​​ കോളുകൾ കിട്ടിയിരുന്നില്ല. യു.എ.ഇയിൽ തന്നെയുള്ള നെറ്റ്​വർക്കുകളിലേക്ക്​ വാട്​സാപ്​​ കോൾ കിട്ടുന്നുണ്ടെന്നും ചില സ്ഥലങ്ങളിൽ നിന്ന്​ മാത്രമാണ്​ നാട്ടിലേക്ക്​ വിളിക്കാൻ കഴിയുന്നതെന്നും അനുഭവസ്ഥർ പറയുന്നു.