കുക്കി യുവാവിന്റെ തലയറുത്ത് കയ്യിൽപിടിച്ച് ബിജെപി എംഎൽഎയുടെ സുരക്ഷാ ജീവനക്കാരൻ; മറുകയ്യിൽ വെട്ടുകത്തിയുമായി പ്രദർശനം

ബിജെപി എംഎൽഎയുടെ സുരക്ഷാ ജീവനക്കാരൻ കുക്കി യുവാവിനെ കഴുത്തറുത്ത് കൊലപ്പെടുത്തിയതായി ആരോപണം. ഡേവിഡ് തേക്ക് എന്ന കുക്കി യുവാവിനെ കൊലപ്പെടുത്തിയത്. കുമ്പിയിലെ ബിജെപി എംഎൽഎ ശാന്തി കുമാർ എന്ന സാനിസം പ്രേംചന്ദ്ര സിങ്ങിന്റെ സെക്യൂരിറ്റി ഗാർഡായ മൈരമ്പം റൊമേഷ് മംഗങ്ങിനെതിരെയാണ് ആരോപണം.

തീക്കിന്റെ അരിഞ്ഞ തലയും മറ്റൊരു കൈയിൽ വെട്ടുകത്തിയുമായി നിൽക്കുന്ന മംഗങ്ങിന്റെ ഫോട്ടോ വ്യാപകമായി പ്രചരിക്കുന്നുണ്ട്. ബിഷ്ണുപൂർ ജില്ലയിലെ ഒരു ജനവാസകേന്ദ്രത്തിൽ മുളവടികൾ കൊണ്ട് നിർമ്മിച്ച ഭിത്തിയിൽ കുക്കി യുവാവിന്റെ വെട്ടിയെടുത്ത തല സ്ഥാപിച്ചതായി റിപ്പോർട്ടുകളുണ്ട്. സംഭവത്തിന്റെ വീഡിയോയും പുറത്തുവന്നിട്ടുണ്ട്. 

ജൂലൈ 2 നാണ് സംഭവം. മണിപ്പൂരിലെ ബിഷ്ണുപൂർ ജില്ലയിൽ ജൂലൈ 2 അർധരാത്രി പന്ത്രണ്ട് മണിക്ക് നടന്ന സംഘർഷത്തിൽ മൂന്നുപേരാണ് കൊല്ലപ്പെട്ടത്. ഇക്കൂട്ടത്തിലാണ് ഡേവിഡ് തേക്ക് തലയറുത്ത് കൊല്ലപ്പെട്ടതെന്നാണ് റിപ്പോർട്ട്.

മണിപ്പൂരിലെ ബിഷ്ണുപൂർ, ചുരാചന്ദ്പൂർ ജില്ലകളുടെ അതിർത്തി പ്രദേശങ്ങളിൽ ഒരു കൂട്ടം ആളുകൾ ക്രൂരമായ ആക്രമണം നടത്തിയതായും നിരവധി വീടുകൾ കത്തിക്കുകയും ആളുകളെ തട്ടിക്കൊണ്ടുപോയതായും റിപ്പോർട്ടുകളുണ്ട്. പൊതുസ്ഥലത്ത് വെച്ച് ആളുകളെ വെട്ടിവീഴ്ത്തുകയും തലയറുത്ത് പ്രദർശനം നടത്തുകയും ചെയ്യുന്നതായി ആളുകൾ പറയുന്നു. 

സംസ്ഥാനത്തെ സംഘർഷഭരിതമായ സാഹചര്യത്തെ തുടർന്ന് താൻ സ്ഥാനമൊഴിയില്ലെന്ന് മുഖ്യമന്ത്രി എൻ ബിരേൻ സിംഗ് വ്യക്തമാക്കിയതിന് തൊട്ടുപിന്നാലെയാണ് അക്രമ സംഭവങ്ങളുണ്ടായത്. കുക്കി സ്ത്രീകളെ നഗ്നമായി പരേഡ് ചെയ്യിച്ച സംഭവത്തിൽ രാജ്യവ്യാപകമായി പ്രതിഷേധം ഉയരുന്നതിനിടെയാണ് പുതിയ റിപ്പോർട്ടുകൾ പുറത്തുവരുന്നത്.