സന്നിധാനത്തെ കരാർ ജീവനക്കാരുടെ ജീവിതം ദുരിതത്തില്‍

ചെറിയ ശമ്പളത്തിന് ജോലി ചെയ്യുന്ന ഇവർക്ക് മതിയായ അടിസ്ഥാന സൗകര്യങ്ങൾ ഒന്നും നൽകാൻ അധികൃതർ തയ്യാറായിട്ടില്ല

ശബരിമല സന്നിധാനത്ത് ജോലി ചെയ്യുന്ന കരാർ ജീവനക്കാരുടെ ജീവിതം തീർത്തും ദുസ്സഹമാണ്. ചെറിയ ശമ്പളത്തിന് ജോലി ചെയ്യുന്ന ഇവർക്ക് മതിയായ അടിസ്ഥാന സൗകര്യങ്ങൾ ഒന്നും നൽകാൻ അധികൃതർ തയ്യാറായിട്ടില്ല. സന്നിധാനത്തെ പല കെട്ടിടങ്ങളുടേയും വരാന്തയിലും ചായ്പിലുമാണ് ഇതര സംസ്ഥാനക്കാരായ ഇവർ ജോലി ചെയ്യുന്നത്.

സന്നിധാനത്തെ മുഴുവൻ മാലിന്യവും ചുമക്കുന്നവരാണിവർ. തുച്ഛമായ വേതനത്തിന് പകലന്തിയോളം പണിയെടുക്കുന്ന ഇവരുടെ ജീവിതം നരകതുല്യമാണിവിടെ. ഒന്ന് കുളിക്കാനോ, മറ്റ് പ്രാഥമികാവശ്യങ്ങൾക്കോ ഉള്ള സൗകര്യം പോലും ഈ തൊഴിലാളികൾക്കില്ല. പണിയെടുത്ത് തളർന്നുറങ്ങുന്നതാകട്ടെ കെട്ടിടങ്ങളുടെ വരാന്തയിലും. കൂടുതൽ സൗകര്യങ്ങൾ ആവശ്യപ്പെട്ടാൽ കരാറുകാരൻ ഇവർക്ക് പിന്നെ ജോലി നൽകില്ല. തൊഴിൽ നഷ്ടം ഭയന്ന് ഈ തൊഴിലാളികൾ പ്രതികരിക്കാതിരിക്കുമ്പോൾ കരാറുകാരന്റേയും അധികൃതരുടേയും ചൂഷണം തുടർന്ന് കൊണ്ടേ ഇരിക്കുന്നു.