കോയമ്പത്തൂരിലെ തെളിവെടുപ്പില്‍ ഒരു മൊബൈല്‍ ഫോണ്‍ കണ്ടെത്തി
Update: 2018-04-24 18:44 GMT
കൊച്ചിയില്‍ യുവനടിയെ ആക്രമിച്ച സംഭവത്തില്‍ പ്രതികളായ സുനിയെയും വിജേഷിനെയും കോയമ്പത്തൂരിലെത്തിച്ച് തെളിവെടുത്തു.
കൊച്ചിയില്‍ യുവനടിയെ ആക്രമിച്ച സംഭവത്തില്‍ പ്രതികളായ സുനിയെയും വിജേഷിനെയും കോയമ്പത്തൂരിലെത്തിച്ച് തെളിവെടുത്തു. ഒരു മൊബൈല്‍ ഫോണും ഒരു ടാബും തെളിവെടുപ്പിനിടെ പൊലീസ് കണ്ടെടുത്തു. ഇവ പൊലീസ് ശാസ്ത്രീയ പരിശോധനക്ക് അയക്കും.
യുവനടിയെ ആക്രമിച്ച ശേഷം തിങ്കളാഴ്ച പുലര്‍ച്ചെയോടെയാണ് സുനിയും വിജീഷും ബസ്സില്‍ കോയമ്പത്തൂരിലെത്തിയത്. വിജീഷിന്‍റെ സുഹൃത്തായ ചാര്‍ളിയുടെ പീളമേട്ടിലെ വാടക വീട്ടില്‍ ഇരുവരും മൂന്ന് ദിവസം തങ്ങി. ചാര്‍ളിയുടെ സുഹൃത്തായ സെല്‍വന്‍റെ കൈവശമുള്ള ബൈക്കുമായി ബുധനാഴ്ച ഇരുവരും കൊച്ചിയിലേക്ക് തിരിച്ചു. സെല്‍വന്‍റെ സുഹൃത്ത് ഗിരിധരന്‍റേതാണ് ബൈക്ക്. പ്രതികള്‍ ബൈക്ക് മോഷ്ടിച്ച് കടന്നതാണെന്ന് സെല്‍വന്‍ പോലീസിന് മൊഴി നല്‍കി.
സുനിയും വിജീഷും ഒളിവില്‍ താമസിച്ച കോയമ്പത്തൂര്‍ പീളമേട് ശ്രീറാം കോളനിയിലെ വീട്ടില്‍ നടന്ന പരിശോധനയില്‍ ഒരു ടാബും ഒരു മൊബൈല്‍ ഫോണും കണ്ടെത്തി. ആലുവ ഡിവൈഎസ്പി കെ ജി ബാബുകുമാറിന്‍റെ നേതൃത്വത്തില്‍ രാവിലെ എട്ടരക്ക് ആരംഭിച്ച തെളിവെടുപ്പ് പന്ത്രണ്ട് മണിക്കാണ് പൂര്‍ത്തിയായത്.