അബുല്ലൈസുമൊത്ത് യുഡിഎഫ് നേതാക്കള്‍; ചിത്രങ്ങള്‍ പുറത്ത്

ദുബൈയിലെ പഞ്ചനക്ഷത്ര ഹോട്ടലില്‍വെച്ചാണ് ഫോട്ടോ എടുത്തിരിക്കുന്നത്

സ്വര്‍ണ്ണ കള്ളക്കടത്ത് കേസിലെ പിടികിട്ടാപ്പുള്ളി അബുല്ലൈസിനൊപ്പം യുഡിഎഫ് നേതാക്കള്‍ നില്‍ക്കുന്ന ചിത്രങ്ങളും പുറത്ത്. ഗള്‍ഫില്‍ വെച്ചെടുത്ത ചിത്രങ്ങളിലാണ് അബുല്ലൈസിനൊപ്പം ടി സിദ്ദീഖ്, പി കെ ഫിറോസ് തുടങ്ങിയവരുള്ളത്. അബുല്ലൈസുമായി ഒരു ബന്ധവുമില്ലെന്ന് വിശദീകരിച്ച് യുഡിഎഫ് നേതാക്കള്‍ രംഗത്ത് എത്തി.

ഇടത് നേതാക്കളും സ്വര്‍ണ്ണ കള്ളക്കടത്ത് കേസിലെ പ്രതിയും തമ്മില്‍ ബന്ധമുണ്ടെന്ന ആരോപണം യുഡിഎഫ് വ്യാപകമായി പ്രചരിപ്പിക്കുന്നതിനിടയിലാണ് യുഡിഎഫ് നേതാക്കള്‍ അബുല്ലൈസിനൊപ്പം നില്‍ക്കുന്ന ചിത്രങ്ങള്‍ പുറത്ത് വന്നത്. ഡിസിസി പ്രസിഡന്റ് ടി സിദ്ദീഖ്, യൂത്ത് ലീഗ് ജനറല്‍ സെക്രട്ടറി പി കെ ഫിറോസ്, യൂത്ത് ലീഗ് നേതാവ് യൂസഫ് പടനിലം എന്നിവരാണ് അബുല്ലൈസിന് ഒപ്പം ചിത്രങ്ങളിലുള്ളത്. ദുബൈയിലെ ഒരു ഹോട്ടലില്‍ വെച്ച് എടുത്തതാണിതെന്നാണ് ആരോപണം. എന്നാല്‍ തെരഞ്ഞെടുപ്പ് പ്രചരണത്തിന് പോയപ്പോഴുളളതാണിതെന്നും അബുല്ലൈസുമായി ബന്ധമില്ലെന്നും ടി സിദ്ദീഖും പി കെ ഫിറോസും വിശദീകരിച്ചു.

പിടികിട്ടാപ്പുള്ളിക്ക് ഒപ്പമുള്ള നേതാക്കളുടെ ചിത്രങ്ങള്‍ പുറത്ത് വന്നത് യുഡിഎഫിനെ പ്രതിരോധത്തിലാക്കി.