തിരുവനന്തപുരത്ത് മ്യൂസിയം വളപ്പിൽ പോത്ത് വിരണ്ടോടി; ഒരാൾക്ക് കുത്തേറ്റു

തിരുവനന്തപുരം: നഗരത്തിൽ പോത്ത് വിരണ്ടോടി പരിഭ്രാന്തി പരത്തി. ഇന്നലെ രാത്രി ഒൻപതു മണിയോടെയാണ് തിരുവനന്തപുരം മ്യൂസിയത്തിലേക്ക് പോത്ത് ഓടിക്കയറി ഒരാളെ ഇടിച്ചിട്ടത്. പോത്തിനെ പിന്നീട് ഫയർഫോഴ്‌സ് വലയിട്ട് പിടികൂടുകയായിരുന്നു.

സായാഹ്ന നടത്തക്കാരെ ഞെട്ടിച്ച് മ്യൂസിയം പരിസരത്തേക്ക് പോത്ത് ഓടിക്കയറുകയായിരുന്നു. നടക്കാനെത്തിയ ഒരാളെയാണ് പോത്ത് ഇടിച്ചിട്ടത്. കാലിനു കുത്തേറ്റ് പരിക്കേറ്റയാളെ ആശുപത്രിയിലേക്ക് മാറ്റി. കശാപ്പുശാലയിലേക്ക് കൊണ്ടുപോയ പോത്താണ് വിരണ്ടോടിയതെന്ന് സംശയമുണ്ട്.

അരമണിക്കൂർ നേരമാണ് പോത്ത് നഗരത്തിൽ പരിഭ്രാന്തി സൃഷ്ടിച്ചത്. ഒടുവിൽ കടുത്ത പ്രയത്‌നത്തിനൊടുവിൽ ഫയർഫോഴ്‌സ് കയറും വലയും ഉപയോഗിച്ച് കുരുക്കിട്ടാണ് പോത്തിനെ പിടികൂടിയത്. ഇതിന്റെ വലതുകൊമ്പ് പൊട്ടി ചോര ഒലിക്കുന്നുണ്ടായിരുന്നു. പോത്തിനെ നഗരസഭയ്ക്കു കൈമാറി.

Summary: Buffalo runs amok on Museum campus in Thiruvananthapuram and a man was stabbed by it