ബൈക്കുകൾ കൂട്ടിയിടിച്ച് ടോറസ് ലോറിക്കടിയിൽപ്പെട്ട യുവാവിന് ദാരുണാന്ത്യം

എറണാകുളം പി.പി. റോഡിൽ സൗത്ത് ഇന്ത്യൻ ബാങ്കിന് സമീപം ബൈക്കുകൾ കൂട്ടിയിടിച്ച് തെറിച്ച് ടോറസ് ലോറിക്കിടയിൽപ്പെട്ട യുവാവിന് ദാരുണാന്ത്യം. പട്ടിമറ്റം ചെങ്ങര നീറ്റുകാട്ടിൽ ശശിയുടെ മകൻ അഖിൽ ശശി (26) യാണ് മരിച്ചത്. വൈകിട്ട് 6.30 ഓടെയാണ് അപകടം. എതിർ ദിശകളിൽ നിന്ന് വന്ന രണ്ട് ബൈക്കുകൾ കൂട്ടിമുട്ടി ഒരു ബൈക്ക് ഓടിച്ചിരുന്ന അഖിൽ കോലഞ്ചേരി ഭാഗത്തേക്ക് ലോഡുമായി പോയ ടോറസിനടിയിലേക്ക് തെറിച്ച് വീഴുകയായിരുന്നു. പട്ടിമറ്റം ഫയർഫോഴ്‌സ് എത്തിയാണ് മൃതദേഹം കോലഞ്ചേരി മെഡിക്കൽ കോളേജിലേക്ക് മാറ്റിയത്. സ്വകാര്യ കമ്പനി ജീവനക്കാരനാണ് അഖിൽ. സഹോദരി അമൃത. മാതാവ് ലാലി. കുന്നത്ത് നാട് പൊലീസ് സ്ഥലത്തെത്തി അപകടത്തിൽ രണ്ടാമത്തെ ബൈക്ക് ഓടിച്ചിരുന്നയാളെ കസ്റ്റഡിയിൽ എടുത്തു.