അത്ര 'ബഹുമാനം' വേണ്ട; ട്രാഫിക് സൈൻ ബോർഡുകളിൽ ഇനി 'ബഹുമാനം' വേണ്ട

പാലക്കാട്: ട്രാഫിക് സൈൻ ബോർഡുകളിൽ ഇനി മുതൽ ബഹുമാനപെട്ട എന്ന പദം ഉപയോഗിക്കില്ല. ട്രാഫിക് എൻഫോഴ്സ്മെന്‍റ് യൂണിറ്റ് സ്ഥാപിച്ച ബോർഡുകളിൽ 'ബഹുമാനപ്പെട്ട കലക്ടറുടെ ഉത്തരവു പ്രകാരം' എന്നാണ് എഴുതിയിരുന്നത്.

കലക്ടർ ബഹുമാനിക്കപ്പെടേണ്ട വ്യക്തിത്വമാണെന്ന് പരസ്യമായി എഴുതിവെക്കുന്നത് ജനാധിപത്യ രീതിയല്ലെന്ന് കാണിച്ച് പൊതു പ്രവർത്തകനായ ബോബൻ മാട്ടുമന്ത ജില്ലാ കലക്ടർക്ക് നിവേദനം നൽകിയിരുന്നു. ഇത് പരിഗണിച്ചാണ് ബോർഡിൽ നിന്നും ബഹുമാനപെട്ട എന്ന പദം മാറ്റാൻ ജില്ലാ കലക്ടർ നിർദേശം നൽകിയത്. പുതിയ ഉത്തരവിന്‍റെ പശ്ചാത്തലത്തില്‍ പാലക്കാട് നഗരത്തിലെ ട്രാഫിക് ബോർഡുകളില്‍ നിന്നും 'ബഹുമാനപെട്ട' എന്ന പദം മായ്ച്ചു തുടങ്ങി.