ഫ്രിഡ്ജില്‍ ഭക്ഷണം സൂക്ഷിക്കുമ്പോള്‍ ഒഴിവാക്കേണ്ട അഞ്ചു കാര്യങ്ങള്‍

നിരനിരയായി അടുക്കി വച്ചിരിക്കുന്ന പഴങ്ങളും പച്ചക്കറികളും...ഒരു ഭാഗത്ത് ഐസ്ക്രീം, ജ്യൂസ്.. ആഹാ പരസ്യങ്ങളിലെ ഫ്രിഡ്ജ് കാണുമ്പോള്‍ ആരുമൊന്നു നോക്കിപ്പോകും. എന്നാല്‍ നമ്മുടെ വീട്ടിലെ ഫ്രിഡ്ജിന്‍റെ കാര്യമോ? കയ്യില്‍ കിട്ടുന്നതെല്ലാം അതില്‍ വയ്ക്കും. റഫ്രിജറേറ്ററില്‍ ഭക്ഷണം സൂക്ഷിക്കുമ്പോള്‍ ശ്രദ്ധിക്കേണ്ട ചില കാര്യങ്ങളുണ്ട്. അത്തരം തെറ്റുകൾ ഒഴിവാക്കുന്നത് ഭക്ഷണം സുരക്ഷിതമായി സൂക്ഷിക്കാൻ മാത്രമല്ല, കൂടുതൽ നേരം ഉപയോഗിക്കാനും സഹായിക്കും.

1. അടുക്കും ചിട്ടയുമില്ലാതെ പച്ചക്കറികള്‍ വയ്ക്കുന്നത്

മാര്‍ക്കറ്റില്‍ നിന്നും വാങ്ങിയ പച്ചക്കറികള്‍ അതേപടി ഫ്രിഡ്ജില്‍ വയ്ക്കുകയാണ് പലരുടെയും രീതി. എന്നാല്‍ ഉരുളക്കിഴങ്ങ് സവാള പോലുള്ളവ റഫ്രിജറേറ്ററില്‍ സൂക്ഷിക്കേണ്ട ആവശ്യമില്ല.ക്യാരറ്റ്, റാഡിഷ്, കോളിഫ്ലവർ തുടങ്ങിയവ പ്ലാസ്റ്റിക് അല്ലെങ്കിൽ പേപ്പർ ബാഗിൽ പൊതിയാതെ സൂക്ഷിക്കണം. ചീര പോലുള്ള ഇലകള്‍ നന്നായി കഴുകിയ ശേഷം വെള്ളം വാര്‍ന്ന ശേഷം ഒരു സിപ് ലോക്കിലാക്കി ഫ്രിഡ്ജില്‍ വയ്ക്കാം.

2. എല്ലാത്തരം പഴങ്ങളും പച്ചക്കറികളും കഴുകുന്നത്

എല്ലാ തരം പഴങ്ങളും പച്ചക്കറികളും കഴുകേണ്ട ആവശ്യമില്ല. കാരറ്റ്, കോളിഫ്‌ളവർ തുടങ്ങിയ പച്ചക്കറികളും പേരക്ക, ഓറഞ്ച് തുടങ്ങിയ പഴങ്ങളും സൂക്ഷിക്കുന്നതിന് മുമ്പ് കഴുകുന്നത് ഉൽപന്നങ്ങളിൽ അധിക ഈർപ്പം അവശേഷിപ്പിച്ച് ബാക്ടീരിയകളുടെ വളർച്ചയ്ക്ക് കാരണമാകും. ഇത് പലതരത്തിലുള്ള ആരോഗ്യപ്രശ്‌നങ്ങളിലേക്കും നയിച്ചേക്കാം.

3. തെറ്റായ അറകളില്‍ ഭക്ഷണം സൂക്ഷിക്കുന്നത്

നിങ്ങൾ ഒരു റഫ്രിജറേറ്ററിലേക്ക് നോക്കുകയാണെങ്കിൽ, വ്യത്യസ്ത തരം ഭക്ഷണങ്ങൾക്കായി ഡിസൈന്‍ ചെയ്ത വ്യത്യസ്ത അറകൾ കാണാന്‍ സാധിക്കും. നിങ്ങൾ സംഭരിക്കുന്ന തരത്തിലുള്ള ഭക്ഷണം കണക്കിലെടുത്താണ് ഇവ ക്രമീകരിച്ചിരിക്കുന്നത്. അതിനാൽ, ഭക്ഷണം വളരെക്കാലം പുതുമയുള്ളതായിരിക്കുമെന്ന് ഉറപ്പാക്കാൻ ശരിയായ ഷെൽഫിൽ ശരിയായ തരത്തിലുള്ള ഭക്ഷണം സൂക്ഷിക്കുക.

4. ഭക്ഷണം കൃത്യമായി മൂടിവയ്ക്കാത്തത്

ബാക്കി വന്ന ഭക്ഷണങ്ങള്‍ ഫ്രിഡ്ജില്‍ സൂക്ഷിച്ച് പിന്നീട് ഉപയോഗിക്കുന്നവരാണ് നമ്മളില്‍ പലരും. ഭക്ഷണത്തിൽ ഏതെങ്കിലും തരത്തിലുള്ള ബാക്ടീരിയകൾ ഉണ്ടാകാതിരിക്കാൻ പാകം ചെയ്ത ഭക്ഷണം കൃത്യമായി പായ്ക്ക് ചെയ്യണം. മൂടി വയ്ക്കാതെ വെച്ചാൽ, പാകം ചെയ്ത ഭക്ഷണം മലിനമാകുമെന്ന് മാത്രമല്ല, ഒപ്പം സൂക്ഷിച്ചിരിക്കുന്ന മറ്റ് ഭക്ഷണങ്ങൾ കേടാകാനുള്ള സാധ്യത വർധിപ്പിക്കുകയും ചെയ്യുന്നു.

5.ഫ്രിഡ്ജില്‍ അമിതമായി സാധനങ്ങള്‍ കുത്തിനിറയ്ക്കുന്നത്

കയ്യില്‍ കിട്ടുന്നതെല്ലാം ഫ്രിഡ്ജില്‍ വയ്ക്കുന്നത് ഫ്രിഡ്ജില്‍ സൂക്ഷിക്കേണ്ട മറ്റു ഭക്ഷണസാധനങ്ങളെ നാശമാക്കും.