ഐഎസ്എല്‍ കലാശപോരാട്ടം നാളെ
Update: 2018-06-03 01:55 GMT
നായകന്‍ സുനില്‍ ഛേത്രിയുടെ മികച്ച ഫോമാണ് ബംഗളൂരുവിന്റെ ശക്തി. ജെജെ ഫോമിലേക്ക് തിരിച്ചെത്തിയത് ചെന്നൈയിനും ആത്മവിശ്വാസം നല്‍കുന്നു...
ഐഎസ്എല്‍ നാലാം സീസണിലെ കിരീട ജേതാക്കളെ നാളെ അറിയാം. കരുത്തരായ ചെന്നെയിന്‍ എഫ് സിയും ബംഗളുരുവും തമ്മിലാണ് ഫൈനല്‍. ബംഗളൂരു ശ്രീ കണ്ഠീരവ സ്‌റ്റേഡിയത്തില്‍ ശനിയാഴ്ച വൈകീട്ട് എട്ട് മണിക്കാണ് പോരാട്ടം.
നാലു മാസം നീണ്ട ഐഎസ്എല്‍ ആവേശത്തിന് നാളെ കൊടിയിറങ്ങുമ്പോള്‍ അറിയാനുള്ളത് കപ്പുയര്‍ത്തുന്നത് ആരാണെന്നു മാത്രം. അയല്‍ക്കാരായ ചെന്നൈയിന്‍ എഫ്‌സിയും ബംഗളുരുവുമാണ് നേര്‍ക്കുനേര്‍ ഏറ്റുമുട്ടാനൊരുങ്ങുന്നത്. സീസണിലെ ഏറ്റവും കരുത്തരായ ടീമുകളാണ് ബംഗളുരുവും ചെന്നൈയും. പ്രാഥമിക റൗണ്ടില്‍ ഒന്നും രണ്ടും സ്ഥാനത്തുണ്ടായിരുന്ന ടീമുകള്‍. ഫൈനല്‍ കനക്കുമെന്ന് ഉറപ്പിക്കാന്‍ മറ്റൊന്നും വേണ്ട.
നായകന്‍ സുനില്‍ ഛേത്രിയുടെ മികച്ച ഫോമാണ് ബംഗളൂരുവിന്റെ ശക്തി. സെമിഫൈനലിന്റെ രണ്ടാം പാദത്തില്‍ ഹാട്രിക്ക് നേടി ഛേത്രി അത് തെളിയിച്ചു. രണ്ടാം പാദത്തില്‍ ജെജെ നേടിയ ഇരട്ട ഗോളിന്റെ മികവിലാണ് ചെന്നൈയിന്‍ ഫൈനലിലേക്ക് എത്തുന്നത്. ജെജെ ഫോമിലേക്ക് തിരിച്ചെത്തിയത് ചെന്നൈയിനും ആത്മവിശ്വാസം നല്‍കുന്നു.
ഐഎസ്എല്ലില്‍ കന്നിക്കാരായ ബംഗളൂരുവും രണ്ടാം സീസണില്‍ ജേതാക്കളായ ചെന്നൈയിനും ഫൈനലിനെത്തുമ്പോള്‍ മികച്ച പോരാട്ടത്തിനായി കാത്തിരിക്കുകയാണ് ആരാധകര്‍.