എൽ ക്ലാസികോ ഇന്ത്യയിലേക്ക് വരുന്നു; റയൽ-ബാഴ്സ ഇതിഹാസങ്ങൾ മുംബൈയിൽ ഏറ്റുമുട്ടും
മുംബൈ: ഒരു കാലത്ത് സ്പാനിഷ് മൈതാനങ്ങളെ ചൂടുപിടിപ്പിച്ച ഇതിഹാസങ്ങൾ ഇന്ത്യയിൽ പന്തുതട്ടുന്നു. ഫുട്ബോൾ ലോകത്തെ ഏറ്റവും വലിയ വൈരികളായ റയൽ മാഡ്രിഡിന്റെയും ബാഴ്സലോണയുടെയും മുൻ താരങ്ങൾ ഇന്ത്യയിലെത്തും. ഏപ്രിൽ ആറിന് മുംബൈ ഡിവൈ പാട്ടിൽ സ്റ്റേഡിയത്തിൽ ഒരുക്കുന്ന മത്സരത്തിൽ ഇതിഹാസ താരങ്ങൾ ബൂട്ടുകെട്ടും.
ലൂയിസ് ഫിഗോ, കാർലോസ് പുയോൾ, ഫെർണാണ്ടോ മോറിയന്റ്സ്, റിക്കാർഡോ കരിസ്മ അടക്കമുള്ള പ്രമുഖ താരങ്ങൾ കളത്തിലിറങ്ങും. കായിക രംഗത്തെ അഭിവൃദ്ധി മുൻനിർത്തി പ്രവർത്തിക്കുന്ന സ്പോർട്സ് ഫ്രൻഡ് എന്ന മത്സരം സംഘടിപ്പിക്കുന്നത്.
‘‘ഇന്ത്യക്ക് ഫുട്ബോളിനോടുള്ള സ്നേഹം എനിക്കറിയാം. മറക്കാനാകാത്ത ഒരു രാത്രി നമുക്ക് മെനയാം’’- പോർച്ചുഗീസ് താരം ലൂയിസ് ഫിഗോ മത്സരത്തെക്കുറിച്ച് പ്രതികരിച്ചു.
‘‘ഇന്ത്യ, നിങ്ങൾക്ക് ഫുട്ബോളിനോടുള്ള അഭിനിവേശം ഞാൻ ദൂരെ നിന്നും കണ്ടിട്ടുണ്ട്. അത് നേരിട്ട് കാണാനുള്ള സമയമായി. മുംബൈയുടെ ഊർജ്ജം അനുഭവിക്കാനുള്ള കാത്തിരിപ്പിലാണ്’’ -ബാഴ്സയുടെ സ്പെയിനിന്റെയും ഇതിഹാസ താരം കാർലോസ് പുയോൾ പ്രതികരിച്ചു.