കൊച്ചിക്കെതിരെ തിരുവിതാംകൂർ; ഫോഴ്സ ആഫ്രിക്ക Vs സാംബാ കൊമ്പൻസ്

രക്തം ചിന്തിപ്പൊരുതിയ നാട്ടുരാജ്യങ്ങൾ തമ്മിലുള്ള പോരാട്ടത്തിൻ്റെ സ്മരണകൾ ഉറങ്ങുന്ന കൊച്ചിയും തിരുവിതാംകൂറും ഇന്ന് മഹീന്ദ്ര സൂപ്പർ ലീഗ് കേരളയുടെ പോരാട്ട ഭൂമിയിൽ നേർക്കുനേർ. ബ്രസീലിയൻ താരങ്ങൾ നിറഞ്ഞ തിരുവനന്തപുരം കൊമ്പൻസ് ആഫ്രിക്കൻ പവർ ഫുട്ബോളുമായി ഇറങ്ങുന്ന ഫോഴ്സ കൊച്ചിയെ നേരിടുന്നത് കലൂർ ജവഹർലാൽ സ്റ്റേഡിയത്തിൽ. കിക്കോഫ് രാത്രി 7.30 ന്.

ലീഗിൽ ഇതുവരെ തോൽവിയറിഞ്ഞിട്ടില്ലാത്ത കൊമ്പൻസ് ഇന്ന് ജയിക്കുന്ന പക്ഷം ലീഗ് ടേബിളിൽ ഒന്നാംസ്ഥാനത്ത് നിലയുറപ്പിക്കും. മൂന്ന് കളികളിൽ രണ്ട് സമനില മാത്രമുള്ള ഫോഴ്സ കൊച്ചിക്ക് സ്വന്തം ഗ്രൗണ്ടിൽ വിജയം മാത്രമാണ് ലക്ഷ്യം.

വണ്ടി വിട്ടോളൂ കലൂർക്ക്

കേരള ബ്ലാസ്റ്റേഴ്സിൻ്റെ രണ്ട് ഐഎസ്എൽ മത്സരങ്ങൾക്ക് ശേഷമാണ് കലൂർ സ്റ്റേഡിയം വീണ്ടും സൂപ്പർ ലീഗ് കേരളക്കായി വേദിയാവുന്നത്. ഇവിടെ നടന്ന ഉദ്ഘാടന മത്സരത്തിൽ ഫോഴ്സ കൊച്ചി മലപ്പുറം എഫ്സിയോട് രണ്ട് ഗോളിന് തോറ്റിരുന്നു. ലീഗിൽ സജീവമായി നിലനിൽക്കാൻ ഇന്നത്തെ മത്സരത്തിൽ പൃഥ്വി ആൻഡ് ടീമിന് ജയിച്ചേ പറ്റൂ. നഗരത്തിലെ കാണികൾക്കൊപ്പം സൂപ്പർ ലീഗ് കേരളക്ക് വേദിയല്ലാത്ത തൃശൂർ, ആലപ്പുഴ, കോട്ടയം ജില്ലകളിൽ നിന്നുള്ളവരും സ്റ്റേഡിയത്തിലെത്തുമെന്ന് ഉറപ്പ്. ഫോർസ ആരാധകപ്പടയും ഗ്യാലറി നിറക്കാനുള്ള തയ്യാറെടുപ്പിലാണ്.

കരുത്തോടെ കൊച്ചി

പറങ്കി പരിശീലകൻ മരിയോ ലെമോസ് തന്ത്രമോതുന്ന ഫോഴ്‌സ കൊച്ചി ആഫ്രിക്കൻ താരങ്ങളാൽ സമ്പന്നമാണ്. ടുണീഷ്യൻ ഇൻ്റർനാഷണൽ മുഹമ്മദ് നിദാൽ, ഐവറി കോസ്റ്റിൽ നിന്നുള്ള ജീൻ ബാപ്പിസ്റ്റെ, ദക്ഷിണാഫ്രിക്കക്കാരൻ സിയാൻഡ ഗുമ്പോ,

കൊളംബിയൻ താരം ലൂയിസ് റോഡ്രിഗസ്, ബ്രസീലിയൻ റാഫേൽ അഗസ്റ്റോ തുടങ്ങിയവർ ബൂട്ടണിയുന്നു.

സന്തോഷ് ട്രോഫി താരങ്ങളായ നിജോ ഗിൽബർട്ട്, അർജുൻ ജയരാജ്, ആസിഫ്, നൗഫൽ, അജയ് അലക്സ് സംഘവും ടീമിന് കരുത്താവും. മുൻ ഇന്ത്യൻതാരം ജോ പോൾ അഞ്ചേരിയാണ് ഫോഴ്സയുടെ സഹപരിശീലകൻ.

ബ്രസീലിയൻ ബ്രാൻഡ്

തിരുവനന്തപുരം കൊമ്പൻസ് ടീമിന്റെ ശരാശരി പ്രായം 22 വയാസാണ്. ഈ യുവ ടീമിൻ്റെ കരുത്ത് ബ്രസീലിയൻ താരങ്ങളും. പരിശീലകൻ അലക്സാന്ദ്രേക്കൊപ്പം ടീമിലെ ആറ് കളിക്കാരും ബ്രസീലിൽ നിന്നുള്ളവരാണ്.

ഡവി കൂൻ, ഔതമർ ബിസ്പോ, മാർക്കോസ് വീൽഡർ, റിനാൻ ജനാരിയോ, പാട്രിക് മോത്ത, ഗോൾകീപ്പർ മിഷേൽ അമേരിക്കോ എന്നീ ബ്രസീൽ താരങ്ങളാണ് ടീമിന്റെ കരുത്ത്. സീസൺ , ശരത്ത്, അസ്ഹർ, അഖിൽ തുടങ്ങിയ മലയാളി താരങ്ങളുമുണ്ട്. തമിഴ്നാട്ടുകാരൻ കാലി അലാവുദ്ദീനാണ് ടീമിൻ്റെ സഹപരിശീലകൻ.