കൊറോണ വൈറസ് ചോര്‍ന്നത് വുഹാന്‍ ലാബില്‍ നിന്നു തന്നെ; സ്ഥിരീകരിച്ച് എഫ്.ബി.ഐ മേധാവി

വാഷിംഗ്ടണ്‍: കോടിക്കണക്കിനാളുകളുടെ ജീവന്‍ അപഹരിച്ച കൊറോണ വൈറസ് മനുഷ്യനിര്‍മിതമാണെന്നും ചൈനയിലെ വുഹാന്‍ ലാബില്‍ നിന്നും ചോര്‍ന്നതാണെന്നുമുള്ള സംശയങ്ങള്‍ ആദ്യം മുതലേ ഉയര്‍ന്നിരുന്നു. അമേരിക്കയടക്കം പല രാജ്യങ്ങളും ചൈനക്കെതിരെ രംഗത്തെത്തിയിരുന്നു. വുഹാന്‍ ഇന്‍സ്റ്റിറ്റ്യൂട്ട് ഓഫ് വൈറോളജിയില്‍ പ്രവര്‍ത്തിച്ചിരുന്ന ശാസ്ത്രജ്ഞര്‍ തന്നെ ഈ വാദത്തെ പിന്തുണച്ചിരുന്നു. ഇപ്പോള്‍ അമേരിക്കയിലെ ഫെഡറല്‍ ബ്യൂറോ ഓഫ് ഇന്‍വസ്റ്റിഗേഷനും(എഫ്ബിഐ) ഇതു സ്ഥിരീകരിച്ചിരിക്കുകയാണ്.

ചൈനീസ് ലാബില്‍ നിന്നാണ് വൈറസ് ചോര്‍ന്നതെന്ന ബ്യൂറോയുടെ റിപ്പോർട്ട് നിലപാട് എഫ്ബിഐ ഡയറക്ടർ ക്രിസ്റ്റഫർ റേ ചൊവ്വാഴ്ച സ്ഥിരീകരിച്ചു.''മഹാമാരിയുടെ ഉത്ഭവം മിക്കവാറും ചൈനയിലെ വുഹാനിൽ നിന്നാണെന്ന് എഫ്ബിഐ കുറച്ച് കാലമായി വിലയിരുത്തുന്നു," ഫോക്സ് ന്യൂസിന്‍റെ ബ്രെറ്റ് ബെയറിന് നൽകിയ അഭിമുഖത്തിൽ റേ പറഞ്ഞു. കോവിഡിനു കാരണമായ സാര്‍സ്‍കോവ്-2 വുഹാനില്‍ നിന്നും ചോര്‍ന്നതാണെന്ന അമേരിക്കന്‍ ഊര്‍ജ ഡിപ്പാര്‍ട്ട്മെന്‍റിന്‍റെ റിപ്പോര്‍ട്ട് പുറത്തുവന്നതിനു പിന്നാലെയാണ് എഫ്ബിഐയുടെ സ്ഥിരീകരണം. വാള്‍സ്ട്രീറ്റ് ജേര്‍ണലും ഇതു റിപ്പോര്‍ട്ട് ചെയ്തിട്ടുണ്ട്. യു.എസ് ഉദ്യോഗസ്ഥര്‍ ഇപ്പോഴും കോവിഡിന്‍റെ ഉത്ഭവത്തെക്കുറിച്ച് അന്വേഷിക്കുകയാണെന്നും ചൈന അന്വേഷണത്തെ കല്ലെറിയുകയാണെന്നും റേ പറഞ്ഞു.

"ജീവശാസ്ത്രപരമായ ഭീഷണികളുടെ അപകടങ്ങളെക്കുറിച്ച് പ്രത്യേകം ശ്രദ്ധ കേന്ദ്രീകരിക്കുന്നു. അതിൽ കോവിഡ് പോലുള്ള നോവൽ വൈറസുകളും തെറ്റായ കൈകളിലെ ആശങ്കകളും ഉൾപ്പെടുന്നു. ചില മോശം ആളുകൾ, ശത്രുതാപരമായ രാഷ്ട്ര രാഷ്ട്രം, ഒരു ഭീകരൻ, ഒരു കുറ്റവാളി, അവർ ഉയർത്തിയേക്കാവുന്ന ഭീഷണി." റേ ബെയറിന് നല്‍കിയ അഭിമുഖത്തില്‍ പറഞ്ഞു. വാൾസ്ട്രീറ്റ് ജേർണൽ റിപ്പോർട്ട് അനുസരിച്ച്, കോവിഡ് ലാബിൽ നിന്നാണെന്ന ഊർജ വകുപ്പിന്‍റെ വാദം അത്ര ആത്മിശ്വാസത്തോടെ ആയിരുന്നില്ല.2021ല്‍ തയ്യാറാക്കിയ റിപ്പോര്‍ട്ടാണ് പുറത്തുവന്നത്. രഹസ്യസ്വഭാവമുള്ള ഈ റിപ്പോർട്ട് ഇന്റലിജൻസ് ഏജൻസികളിൽ നിന്ന് ലഭിച്ച വിവരങ്ങൾ കൂടി ചേർത്ത് അടുത്തിടെ യു.എസ് കോണ്‍ഗ്രസ് അംഗങ്ങള്‍ക്കും വൈറ്റ് ഹൗസിനും സമര്‍പ്പിച്ചെന്നും വാള്‍ സ്ട്രീറ്റ് റിപ്പോര്‍ട്ട് പറയുന്നു.

രോഗബാധിതനായ ഒരു മൃഗത്തിൽ നിന്ന് സ്വാഭാവികമായി വൈറസ് മനുഷ്യരിലേക്ക് പടര്‍ന്നതാണെന്നാണ് നാഷനൽ ഇന്‍റലിജന്‍സ് കൗൺസിലും മറ്റ് നാല് അജ്ഞാത ഏജൻസികളും ഇപ്പോഴും വാദിക്കുന്നതെന്ന് ജേണൽ റിപ്പോർട്ട് ചെയ്തു. എന്നാല്‍ ഇതിനും കൃത്യമായ തെളിവില്ല. എന്നാല്‍ വൈറസ് വുഹാന്‍ ലാബില്‍ നിന്നും ചോര്‍ന്നതാണെന്ന കാര്യം വൈറ്റ് ഹൗസ് നിഷേധിക്കുന്നുണ്ട്. കൊറോണയുടെ ഉത്ഭവം വുഹാനില്‍ നിന്നാണെന്നതിന് കൃത്യമായ തെളിവില്ലെന്നാണ് വൈറ്റ് ഹൗസ് വ്യക്തമാക്കുന്നത്. പൊട്ടിത്തെറിയുടെ ഉറവിടം തങ്ങൾക്ക് ഒരിക്കലും അറിയാൻ കഴിയില്ലെന്ന് മുൻ വൈറ്റ് ഹൗസ് ചീഫ് മെഡിക്കൽ അഡ്വൈസർ ആന്റണി ഫൗസി തിങ്കളാഴ്ച വ്യക്തമാക്കി. ബോസ്റ്റൺ ഗ്ലോബിന് നൽകിയ അഭിമുഖത്തിൽ എല്ലാ സാധ്യതകളോടും 'തുറന്ന മനസ്സ്' സൂക്ഷിക്കാൻ അദ്ദേഹം ആളുകളോട് അഭ്യര്‍ഥിച്ചു.